Foto: Tengrinews.kz/Álihan Sariev
Almaty prokýratýrasy sheteldikterge kóshi-qon zańnamasynyń normalaryn túsindirdi, - dep habarlaidy Tengrinews.kz agenttigi.
Qadaǵalaý organy Qazaqstanda júrgen sheteldik azamattarǵa júginip, olardan saqtyq sharalaryn saqtaýdy surady.
"Qurmetti respýblikamyzdyń qonaqtary! Sheteldik azamattar legi artýyna bailanysty kóshi-qon zańnamasyn túsindirý qajettiligi týyndady. Osy kezeńde qonaqtar arasynda kórshi memlekettiń sanaly azamattarymen qatar, túsiniksiz sebeptermen kelgen adamdardyń da elge kirý qaýpi bar. Sondyqtan sizderden saqtyq sharalaryn saqtaýdy suraimyz. Zańnamadaǵy bul norma kóshi-qon protsesteriniń yqtimal teris saldaryn boldyrmaý úshin dál qarastyrylǵanyn este saqtańyz.
Qurmetti qonaqtar! Nazarlaryńyzǵa usynamyz: EAEO-ǵa múshe memleket azamattarynyń bolý merzimi habarlama bolǵan jaǵdaida memlekettik shekarany kesip ótken sátten bastap 90 kúntizbelik kúnnen keiin aiaqtalady", - dedi prokýrorlar.
Bul normalardy saqtamaǵany úshin zańnamada ÁQBtK-niń 517-babyna sáikes ákimshilik jaýapkershilik kózdelgeni atap ótildi.
"Qurmetti Almaty turǵyndary! "Kóship kelýshilerdiń Qazaqstanǵa kelý jáne bolý erejelerine" sáikes qabyldaýshy tarap, iaǵni Qazaqstan azamattary jáne Qazaqstanda tirkelgen zańdy tulǵalar immigranttar týraly kóship kelgen kúnnen bastap úsh jumys kúni ishinde ishki ister organdaryna habarlaýǵa mindetti.
Sheteldiktiń kelýi týraly habarlama úsh tásilmen (elektron viza jáne kóshi-qon portaly arqyly, tikelei kóshi-qon qyzmeti bólimine nemese E-Qonaq qosymshasy arqyly) berilýi múmkin", - dep tolyqtyrdy qadaǵalaý organy ókilderi.
Kórsetilgen merzimdi buzǵany úshin ÁQBtK-niń 518-babyna sáikes Qazaqstan azamattary men zańdy tulǵalarǵa 10-nan 20 AEK-ke deiin, al qaitalap buzǵany úshin - 30-dan 100 AEK-ke deiin ákimshilik jaýapkershilik kózdelgen. Bir AEK 3063 teńgege nemese 382 rýblge teń.
