Almatyda Tuńǵysh Prezident parkinde interaktivti «sóileitin» oryndyq paida boldy. Oryndyqtar belgili qazaq aqyndarynyń óleńderin oqidy, dep habarlaidy "Ult aqparat".
Osyndai interaktivti oryndyqtar Bostandyq aýdanynda birneshe jerde qoiylatyn boldy.
«2019 jyly «Qatysý biýdjeti» jobasyna sáikes Bostandyq aýdanynyń turǵyndary 2 235 mln teńge somasyna 47 usynys engizgen bolatyn. Olardyń ishinde quny 963,7 mln teńgege 34 joba daýys berýge joldandy. Búginde osy joba aiasynda QR Tuńǵysh Prezidenti parkinde 1 interaktivti oryndyq qoiylǵan. Qazir turǵyndardan ótinish kóp túsip jatyr. Bir oryndyq quny 1 mln teńge shamasynda», - dedi búgin onlain brifing barysynda Bostandyq aýdany ákiminiń orynbasary Serik Ádilbaev.
Oryndyqtyń ishinde aýdiojúie ornatylady. Oǵan belgili tarihi tulǵalardyń biografiiasy, ánder men óleńder jazylady.
Adam oryndyqqa otyrǵan kezde aýdio qosylady.
«Odan bólek, «Open Almaty» portalynda ashyq daýys berý arqyly 3 joba jeńimpaz atandy. Quny 9,5 mln teńge bolatyn Workout aimaq pen balalar alańy qurylysy, Jarokov 284/1 mekenjaiyndaǵy quny 6,6 mln teńge bolatyn balalar oiyn alańy, quny 1,7 mln teńge Togizkumalak Smart nation jobasy. Bostandyq aýdany ákimdiginiń apparaty 2020 jyly osy jobalarǵa 14,3 mln teńge qarastyrdy. Jobalardyń barlyǵy qazir aiaqtalyp qaldy», - dedi Serik Ádilbaev.
