QR Densaýlyq saqtaý vitse-ministri Ajar Ǵiniiat koronavirýs juqtyryp alǵan Almaty oblysynyń ákimi Amandyq Batalovtyń em alý úshin elordadaǵy Kardiohirýrgiialyq ortalyqqa aýystyrylý sebebin túsindirdi, dep habarlaidy QazAqparat.
Vitse-ministr Ortalyq kommýnikatsiialar qyzmetindegi brifing barysynda málim etkendei, Amandyq Batalovtyń densaýlyǵy nasharlap ketkennen keiin ol astanadaǵy Ulttyq ǵylymi kardiohirýrgiia ortalyǵyna jetkizilgen. Óitkeni, bul ortalyq indet kezinde respýblikalyq ekstrakorporaldy membrandy oksigenaza kezindegi qarqyndy terapiia ortalyǵy bolyp qaita jasaqtalǵan edi.
«Bul ádis ókpeni jasandy jeldetý kómek kórsetpeitin kezde qoldanylady. Ortalyq júrek-qan tamyrlary aýrýlary aiasynda aýyr tynys alý jespeýshiligi órshigen naýqastardy qabyldaidy», - dedi Ajar Ǵiniiat.
Esterińizge sala ketsek, 22 maýsym kúni Almaty oblysynyń ákimi Amandyq Batalovtan koronavirýs anyqtalǵany habarlanǵan edi.
Keiin áleýmettik jelide óńir basshysy Taldyqorǵan qalasyndaǵy kópsalaly aýrýhananyń bir bóliminde jalǵyz jatqandyǵy týraly aqparat tarady. Biraq ákimniń baspasóz qyzmeti muny joqqa shyǵardy.
