Foto: TJM
Almaty oblysynda qatty turmystyq qaldyqtar poligonynda shyqqan órtti aýyzdyqtaý sharalary táýlik boiy júrgizilip jatyr, dep habarlaidy Ult.kz.
Tótenshe jaǵdailar ministri Shyńǵys Árinovtiń tapsyrmasymen keshe keshke órt ornyna Órtke qarsy qyzmet komitetiniń tóraǵasy Erlan Tóregeldiev bardy. Is-qimyldardy úilestirý oqiǵa ornynda qurylǵan jedel shtab pen ministrliktiń Komandalyq ortalyǵynan bir mezgilde júzege asyrylýda.
Órtti sóndirý úshin alty ýchaske qurylyp, «Tereń-Qara» ózeninen sý jetkizetin magistraldyq jeli tartyldy. Jumysqa 6 birlik tehnika, sonyń ishinde avtomobil-sorǵy jeńi men 5 avtotsisterna jumyldyryldy. Sondai-aq órtti sóndirýge 11 órt oqpany jáne 1 tasymaldy lafetti oqpan berilgen.
Alaida órtti aýyzdyqtaý 10 metr tereńdiktegi byqsýmen, órt júktemesiniń joǵary bolýymen jáne jel baǵytynyń ózgerýimen kúrdelene túsýde.
Tilsiz jaýmen kúreske Almaty jáne Shymkent qalalarynan, Qaraǵandy, Túrkistan, Jambyl, Jetisý jáne Abai oblystarynan qutqarýshylar men arnaiy tehnika tartyldy. Buǵan qosa QR TJM-niń áskeri bólimderi de jumyldyrylǵan. Barlyǵy 200-den astam maman men 90-nan astam tehnika táýlik boiy jumys istep jatyr.
Qutqarýshylar oshaqtardy inertti materialdarmen toltyryp, topyraqty nyǵyzdaý ádisin qoldanýda. Bul tásil otteginiń qoljetimdiligin shektep, órttiń tolyq joiylýyn qamtamasyz etýge múmkindik beredi.
