Almaty oblysyndaǵy sailaý komissiiasynyń múshesi Qaharman Jaqsylyq óńirdegi aýdan ákimderin sailaý barysyn baiandady, dep habarlaidy QazAqparat.
«Almaty oblysynda 71 aýyldyq okrýg ákimin saidaý 20 aýdannyń 17-sinde taǵaiyndalǵan bolatyn. Bul rette 60 ákim ókilettik merziminiń aiaqtalýyna bailanysty, 11-i – ókilettik merzimderiniń buryn toqtatylýyna bailanysty sailanatyn bolady. Tirkelgen 235 úmitkerge sailaýshylar búgin daýys berýde», - dedi Q. Jaqsylyq «24 Habar» telearnasynda ótken brifingte.
Buǵan deiin habarlanǵandai, oblysta 82 úmitker saiasi partiialardan, al 153 adam – ózin-ózi usynǵandar bolyp otyr. Ortasha básekelestik – bir orynǵa 3,3 adam. Barlyq okrýgterge úmitkerler sany úshten kóp.
«Sailaý komissiialary usynǵan derekterge sáikes, 2021 jyldyń 25 shildesindegi saǵat 10:00-de sailaý biýllenterin tizimge engizilgen sailaýshylardyń jalpy sanynyń 17 paiyzy aldy. Nemese 38 783 adam daýys berdi. Bizdiń oblystyń turǵyndary dástúrli túrde joǵary elektoraldyq belsendilik tanytyp otyr», - deidi Qaharman Jaqsylyq.
Aita keteiik, búgin táýelsiz Qazaqstannyń tarihynda tuńǵysh ret aýyl, kent, aýyldyq okrýg jáne aýdandyq mańyzdaǵy qala ákimderiniń sailaýy ótedi. Aýmaqtyq sailaý komissiialarynyń málimetinshe, barlyǵy 730 sailaý okrýginde 2582 kandidat usynylǵan. Olardyń 2297-i tirkeýden ótken.
Kandidattardyń basym bóligi – óz-ózin usynýshylar. Sailaý týraly zańnamaǵa engizilgen tolyqtyrýlar men túzetýlerdiń arqasynda aýyl ákimderiniń sailaýyna túskisi keletin úmitkerge óz-ózin usyný múmkindigi berilgen bolatyn. Osy múmkindikti bul jolǵy sailaýda 1419 adam paidalanyp otyr.
Sondai-aq, 878 úmitkerdi Ádilet ministrliginiń tirkeýinde bar 6 saiasi partiia usynǵan.
Halyqtyń daýys berýi arqyly ákim bolǵysy keletinderdiń genderlik quramyna kelsek, er úmitkerlerdiń sany –1839. Solarmen birge 458 áiel úmitker baǵyn synaǵaly otyr.
