Almaty oblysynda jeńil kólik poiyzǵa soǵyldy, dep habarlaidy QazAqparat.
Oqiǵa ornynan túsirilgen sýretter áleýmettik jelide paida boldy.
«Qazaqstan temir joly» baspasóz qyzmetiniń málimetinshe, jol apaty 1 maýsym kúni tańǵy saǵat 6:00 shamasynda Almaty oblysynyń Buryndai – JEO-2 ýchaskesinde bolǵan.
«Kólik júrgizýshisi 35 vagony bar manevrlik teplovozǵa jol bermei, ótkelge shyǵyp ketken. Mashinist jedel tejegishti basqan. Vagondardyń relsten shyǵyp ketýine jol berilmedi. Jeńil avtokóliktiń jolaýshysynyń qoly synyp, aýrýhanaǵa tústi, júrgizýshi zardap shekken joq», - dep habarlady kompaniiadan.
Qazirgi ýaqytta poiyz basqa lokomotiv arqyly joldan shyǵaryldy. Temir jol ótkeli kólik qozǵalysy úshin ashyq.
«Kirme joly JEO-2-ge, teplovoz jeke menshikke tiesili. Oqiǵanyń aldyn ala sebebi - kólik júrgizýshisiniń jol qozǵalysy erejesin buzýy», - dep atap ótti kompaniiadan.
