Almaty oblysy Kerbulaq aýdanynyń politseileri jergilikti turǵynnyń 6 bas siyryn jaiylymnan qoldy qyldy degen kúdikpen 25 jáne 29 jastaǵy eki azamatty ustady, dep habarlaidy "Ult aqparat".
Almaty oblystyq politsiia departamenti baspasóz qyzmetiniń málimetinshe, jedel izdestirý sharalary barysynda qoldy bolǵan siyrlar tabylyp, zańdy iesine qaitarylǵan.
«Qylmysqa qatysy bar degen kúdikpen Kerbulaq jáne Kóksý aýdandarynyń eki turǵyny qamaqqa alyndy. Olardyń aýdan turǵynynyń 6 siyryn urlaǵany dáleldendi. Qazirgi ýaqytta kúdiktilerdiń ózge de qylmystarǵa qatysy bar-joǵy tekserilýde»,- deidi Kerbulaq APB bastyǵy, politsiia podpolkovnigi Erbol Ahmetqaliev.
Tergeý barysynda kúdiktilerdiń aýdan ortalyǵy mańyndaǵy avtojol boiynda jaiylyp júrgen siyrlardy «Gaz-53» kóligine tiep, urlap ketkeni anyqtalǵan. Urlyq izin jasyrý maqsatynda olar siyrlardy Kóksý aýdanyna aparyp, ózge bireýge arzan baǵaǵa satyp jibergen.
Kúdiktiler buǵan deiin qylmystyq jaýapkershilikke tartylmaǵan. Olar qylmysqa qarjylai qajettilik bolǵandyqtan barǵanyn jáne satyp alýshynyń aqshasyn óz qajetine jumsaǵanyn habarlaǵan.
Mal ieleri eki apta boiy siyryn ózderi izdep, taba almaitynyn bilgen soń politsiiaǵa aryz jazǵan.
Aýdandyq ishki ister organy bastyǵynyń aqparatyna sáikes, tártip saqshylary mal urlyǵynyń aldyn alý jáne oǵan qatysy bar qylmystardy ashý sharalaryn kúsheitken. Qyrkúiek aiynda Kerbulaq aýdanynyń politseileri mal urlyǵyna qatysy bar degen kúdikpen tórt azamatty qamaqqa alǵan. Olardyń zańsyz áreketi aýyr qylmystar sanatyna jatqyzylǵan.
Sonymen qatar, iz kesýshiler arnaiy shara barysynda qoldy bolǵan 5 jylqy, 6 siyr men usaq maldy aman-esen taýyp, zańdy ielerine tapsyrǵan.
