Almatyda iz-túzsiz joǵalyp, birneshe kúnnen keiin Almaty oblysy aýmaǵynan máiiti tabylǵan 25 jastaǵy Erzat Eginbaidyń jaqyndary áleýmettik jeli arqyly úndeý jasap, istiń ádil tergelýin talap etti, dep habarlaidy ult.kz.
Buǵan deiin politseiler men eriktiler Almatynyń Jetisý aýdanynda kúndiz jumys ornynan shyǵyp ketip, qaita oralmaǵan jigitti izdestirip jatqany habarlanǵan edi.
Týystarynyń aitýynsha, Erzat Shalqaruly 19 mamyr kúni saǵat 14:00 shamasynda Raiymbek dańǵyly boiyndaǵy jumysynan dúkenge shyǵatynyn aityp ketken. Osydan keiin onymen bailanys úzilgen. Onyń telefony sońǵy ret Almaty oblysy aýmaǵynda tirkelgen.
Marqumnyń aǵasy Erzattyń buryn-sońdy úiden eskertýsiz ketpegenin, eshqandai meditsinalyq esepte turmaǵanyn jáne qylmystyq jaýapkershilikke tartylmaǵanyn aitty.
Tórt kúnnen keiin jigittiń kóz jumǵany belgili boldy. Marqumnyń týystarynyń sózinshe, onyń denesi Kosmos aýyly mańyndaǵy kólshikten tabylǵan.
Jeńgesiniń aitýynsha, aldyn ala málimet boiynsha Erzat qatygezdikpen óltirilip, keiin sýǵa tastalǵan bolýy múmkin. Máiitti sol mańda júrgen balyqshylar baiqap, quqyq qorǵaý organdaryna habar bergen.
Marqumnyń jaqyndary kinálilerdiń tolyq jaýapqa tartylyp, ádil jaza alýyn talap etti.
"Eń ókinishtisi — biz Erzat joǵalǵan alǵashqy kúnnen bastap óz kúshimizben barlyq baǵytty izdep, aǵaiyn-týyspen birge kameralardy ashtyryp, júrgen marshrýtyn anyqtap berdik. Soǵan qaramastan, jaýapty organdar tarapynan tiisti deńgeide jumys bolmady. Birde-bir jedel áreket naqty nátije bermedi. Biz kórsetken derekter men baǵyttarǵa der kezinde nazar aýdarylmady.
Osy jaǵdai boiynsha jaýapty adamdar da tiisti jaýapkershilikke tartylýy tiis dep esepteimiz.
Qazirgi tańda barsha adam surap jatqandyqtan, osy málimetti jariialaýdy jón kórdik.
Sizderden suraitynymyz — bizdiń ádildik tabýymyzǵa tilektes bolyp, duǵada bolyńyzdar. Ádildik ornasyn. Kináliler jazasyn alsyn", - dep jazdy marqumnyń týysy.
