Almaty oblysy Kerbulaq aýdanynda altyn qursaqty «Batyr ana» Gúlnáz Jeńisbaiqyzy 14-shi sábiin dúniege ákeldi. Otbasyn osy qýanyshymen aýdan ákimi Ǵaliasqar Sarybaev quttyqtady. Atap ótsek, bul otbasyǵa 2019 jyly Saryózek aýylynan kóp balaly sanatymen turǵyn úi berilgen bolatyn, dep habarlaidy Almaty oblysy ákiminiń baspasóz qyzmeti.
Sársenbai Sadýaqasov pen Gúlnaz Jeńisbaiqyzynyń shańyraq kótergenine 27 jyl bolǵan. Búginde olar 10 qyz 4 ul tárbielep otyr, 3 nemere kórdi.
Kerbulaq aýdandyq ákimdiginiń málimetine súiensek, mektep qabyrǵasyndaǵy bes bala oqý quraldarymen, sporttyq kiimmen, mektep formasymen tolyq qamtamasyz etilgen, úsheýi balabaqsha jasynda. Onlain oqýlaryna qajetti noýtbýk te mektepten berilgen. Qyzy Aijan sporttyń erejesiz jekpe-jek túrine qatysyp, júldeli oryndarǵa ie bolyp júr. Otaǵasy mashinist, mehanik, dánekerleýshi siiaqty kásipterdi erkin meńgergen.
«Ómirdiń máni de, sáni de - bala. Densaýlyǵym jetse, bala týýdan qashpaimyn. Qazaq «balany jastan» degendi beker aitpaǵan. Úlken qyzym muǵalim. «Aldyńǵy arba qaida barsa, sońǵy arba sonda júredi» deidi, sondyqtan aldyńǵy ul-qyzdardy jaqsy tárbieleseń, sońǵylary solarǵa eliktep, úlgi etip ósedi dep oilaimyn«, - deidi Gúlnáz Jeńisbaiqyzy.
Eske salsaq, jalpy Almaty oblysynda kóp balaly otbasylaryna qajetti kómek kórsetý jolǵa qoiylǵan. Ótken jyly 2 395 otbasyna turǵyn úi berilse, sonyń 1 258-i áleýmettik áljýaz jáne kóp balaly otbasylar, bul qatarda 180 otbasy metsenattardyń qoldaýymen úili bolǵanyn da atap ótý kerek.
Sol siiaqty oblys ortalyǵy Taldyqorǵanda kóp balaly analar jumys isteitin tigin tsehyn ashý qolǵa alynǵan. Qazirgi kezde tseh ornalasatyn oryn jóndeýden ótkizilip, daiyndalý ústinde. Jalpy biylǵy jyldyń 1 sáýirine ataýly áleýmettik kómek 14761 otbasyna 2 mlrd. 103,9 mln. teńge kóleminde taǵaiyndalǵan, onyń ishinde az qamtylǵan kóp balaly otbasylar da bar.
