Biyl qańtar aiynda Almaty oblystyq balalar klinikalyq aýrýhanasynyń dárigerleri bógde zattardy jutyp qoiǵan 94 balany qutqaryp qalǵan, dep habarlaidy QazAqparat.
Mamandar balalardyń tynys alý joldary, óńeshte, murynda, asqazanda, qulaqta jáne ishekte turyp qalǵan bógde zattardy alǵan. Jas shamasy 6 aidan 5 jasqa deiingi balalardyń aǵzasynan monetalar, saǵat batareialary (himiialyq kúiik beredi), shegeler, túireýishter, kiimniń salpynshaqtary, piste qabyǵy, jańǵaq, qalam qalpaǵy tabylsa, qulaq pen murynnan usaq monshaqtar, qaǵaz, porolon, tastar alynǵan.
Dárigerlerdiń aitýynsha, ata-analar bógde zat balalardyń aǵzasyna túskennen keiin 2-10 kún aralyǵynda ǵana dáriger kómegine júgingen. Aǵzadaǵy keibir bógde zattar rentgen zertteýi nemese ÝDZ jasaǵan kezde tabylǵan. Atalǵan klinikaǵa 2020 jyldyń ekinshi jartyjyldyǵynda ártúrli satydaǵy bógde zattar aǵzasyna túsken 21 bala jetkizilgen.
Sonymen qatar balalar arasynda himiialyq suiyqtyqty iship (turmystyq tazalaý quraldaryn), aýyz jutqynshaǵy men óńeshi kúiik alǵandar da bar. 2020 jyldyń ekinshi jartyjyldyǵynda «óńesh túinegi» diagnozymen 22 bala em qabyldaǵan. Dárigerlerdiń aitýynsha, ishki aǵzasyn himiialyq kúiik shalǵan balalar múgedek bolyp, múmkindigi shekteýli balalar qataryna qosylǵan.
Dárigerler bul jaǵdai ata-analardyń balalarǵa salǵyrt qaraýynyń sebebinen oryn alyp otyrǵanyn aitady. Biraq ata-analar ózderin kináli sanamaidy. Onyń ornyna dárigerlerge dórekilik tanytý jii kezdesetini aitylýda. Sondyqtan mamandar ata-analardy bala ómirine jaýapkershilikpen qaraýǵa shaqyrady.
