Foto: elements.envato.com
Almaty oblysynda 12 jastaǵy oqýshy úsh mektepke bomba qoiylǵany týraly jalǵan habarlama jibergen. Jyl basynan beri segiz qazaqstandyq jalǵan aqparat taratqany úshin túrmege qamalǵan. Bul týraly brifingte Ishki ister ministrliginiń resmi ókili Shuǵyla Turlybek málimdedi, - dep habarlaidy Tengrinews.kz agenttigi.
Turlybek 22 qyrkúiekte Almaty oblysynyń Ile aýdanynda úsh jalpy bilim beretin mektepke ornatylǵan jarylǵysh qurylǵylar týraly elektrondyq poshta arqyly habarlanǵanyn aitty.
"Politsiia UQK-men birlesip osy qylmysty jasaǵan 12 jastaǵy oqýshyny anyqtady. Qylmystyq jaýapkershilik jasyna jetpeýine bailanysty oqýshyǵa qatysty qylmystyq is toqtatyldy. Biraq onyń ata-anasy kámeletke tolmaǵan balany tárbieleý jónindegi mindetterin oryndamaǵany úshin ÁQBtK-niń 127-baby boiynsha ákimshilik jaýapkershilikke tartylyp, 10 AEK kóleminde ákimshilik aiyppul salyndy", - dedi Turlybek.
Onyń aitýynsha, mundai qaýipterdiń kópshiligi shetelden keledi.
"Internette match dep atalatyn anonimdi qaýymdastyq jumys isteidi. Olar basqa adamdardyń atynan jedel qyzmetterge jalǵan habarlama jiberýmen ainalysady.
Qazaqstandyq oqýshylar arasynda da osyndai toptarǵa degen qushtarlyq baiqalady. Sondyqtan quqyq qorǵaý organdary ata - analarǵa balasynyń internettegi minez-qulqyna muqiiat qaraý qajettiligi týraly eskertti", - dep atap ótti Turlybek.
IIM arnaiy organdarmen birlesip, shabýyldaýshylardyń IP-mekenjailaryn, akkaýnttaryn jáne basqa da málimetterin belgileý úshin sheteldik quqyq qorǵaý organdarymen, sondai-aq internet-provaiderlermen belsendi ózara is-qimyl jasaidy.
"Sońǵy 2 aida ǵana internet arqyly jalǵan habarlamalar jibergen 5 adam anyqtaldy.
Jalpy, jyl basynan beri osyndai áreketter úshin 28 adam qylmystyq jaýapkershilikke tartyldy, olardyń segiizi bas bostandyǵynan aiyryldy", - dedi ol.
