Almaty joldary qalyń tuman men jaýyn shashyn saldarynan muz aidynyna ainaldy, dep habarlaidy "Ult aqparat".
Turǵyndar áleýmettik jelide kóktaiǵaq kesirinen bolǵan jol apatynyń sýreti men videosyn tarata bastady.
Instagram jelisindegi kris.p.official paraqshasynda Abai men Sain qiylysyndaǵy jol apatynyń videosy tarady.
«Jolaýshylarǵa abai bolýdy eskertemiz. Qalada qatty kóktaiǵaq. Qajettilik bolmasa shyqpańyzdar. Jol apaty kóp bolyp tur» delingen jazbada.
Kris_p_kz pabliginde basqa da jol apattarynyń sýreti jariialandy.
«Almaty. Kóktaiǵaq. Úlken Almaty kanaly, Shyǵys ainalma joly, Móńke bi, ál-Farabi... barlyq jerde jol apaty bop jatyr» delingen jazbada.
Sonymen qatar, Súiinbai kóshesinde eki adamdy kólik qaǵyp ketti.
Qazgidromettiń boljamy boiynsha, 17 naýryzǵa deiin kún jaýyn-shashyndy bolady dep kútilýde.
Erteń, 14 naýryzda kúndiz aýa raiy +2 gradýs bolyp, nóserli jaýyn-shashyn bolady. Qalǵan kúnderi de aýa raiy jaýyn-shashyndy bolmaq.
Túngi ýaqytta aýa temperatýrasy -7 gradýsqa deiin tómendeýi múmkin.
Qazirgi ýaqytta aýdandyq ákimdikterde sý basý men kóktaiǵaqtyń aldyn alý úshin táýliktik kezekshilik uiymdastyryldy.
«Kommýnaldyq qyzmetterdiń qar tazalaý jumystaryn jedel ári sapaly júrgizý úshin, avtokólik júrgizýshilerinen kólik qozǵalysyn shekteýdi jáne kólikterin jol jiekterine qoimaýlaryn suraimyz. Qar tazalaýǵa kedergi keltiretin kólikterdi evakýatorlardyń alyp ketetinin eskertemiz. Eger kólikpen júrýdiń qajettiligi týyndasa, júrgizýshilerdi jyldamdyqty azaityp, avtomobilder arasynda qashyqtyqty ulǵaitýǵa jáne kenetten manevr jasamaýǵa shaqyramyz» dep habarlady Qazgidromet.
