Almaty - Qorǵas tasjolynda 17 kólik apatqa ushyrady. Jelide iri jol-kólik oqiǵasynyń videosy tarady, - dep habarlaidy Tengrinews.kz agenttigi.
Aimaq politsiiasynyń málimetinshe, jol apaty Almaty - Qorǵas avtojolynyń 134-shaqyrymynda saǵat shamamen 10.00-de bolǵan.
"Qalyń tumannyń saldarynan 17 avtokólik jol apatyna ushyrady. Bes adam zardap shekti, olar Shelek aýylynyń aimaqtyq aýrýhanasyna jetkizildi. Oqiǵa ornynda patrýldik politsiia jasaqtary jumys istep jatyr. 84-ten 136-shaqyrymǵa deiingi avtojol ýchaskesi jabyldy", - dep habarlady PD baspasóz qyzmetindegiler.
"Qurmetti júrgizýshiler, sizderden qozǵalys kezinde barynsha muqiiat jáne saq bolýdy suraimyz! Jyldamdyq rejimin, qaýipsiz qashyqtyqty jáne manevr jasaý erejelerin múltiksiz saqtańyz!" - dedi politsiia ókilderi qazaqstandyqtarǵa.
Almaty oblysy TJD baspasóz qyzmetiniń málimetinshe, 2021 jyldyń 25 jeltoqsanynda saǵat 12.00-den bastap tuman men nóldik kórinýge bailanysty respýblikalyq mańyzy bar Almaty - Qorǵas jolynda (24-140-shaqyrym, Arman kenti - Shelek aýyly) barlyq avtokólik túri úshin qozǵalys jabyldy.
Buǵan deiin Almaty oblysynda aýa raiynyń qolaisyzdyǵyna bailanysty (boran, kórimdiliktiń tómendeýi) 25 jeltoqsanda saǵat 9.30-dan bastap Úsharal - Dostyq avtojolynyń 83-184-shaqyrymynda, Kóktýma stantsiiasy - Dostyq stantsiiasy ýchaskesinde (jóndelip jatyr) avtokóliktiń barlyq túri úshin qozǵalys shektelgeni habarlanǵan bolatyn.
