Reseide áskeri mobilizatsiia bastalǵaly Almatyǵa 5066 Resei azamaty kirip, keiin 4172-si ketip qalǵan. Bul týraly Óńirlik kommýnikatsiialar qyzmetiniń alańynda qala ákiminiń orynbasary Arman Qyryqbaev aitty, dep habarlaidy QazAqparat.
Spiker QR Prezidenti Qasym-Jomart Toqaevtyń tapsyrmasy aiasynda Almaty qalasynyń ákimdigi Resei Federatsiiasy azamattarynyń kelýine qatysty arnaiy jospar daiyndaǵanyn málim etti.
«22-27 qyrkúiek aralyǵynda Almaty qalasyna 5 066 RF azamaty kelip, onyń 4 172 qaita shyǵyp ketken. Al qalǵan 894 reseilik qala aýmaǵynda qaldy. Bul - bizdiń qala úshin úlken kórsetkish emes. Almatynyń barlyq qyzmetteri túgel qajetti jumysty oryndaýǵa daiyn. Memlekettik organdar zańǵa jáne halyqaralyq mindettemelerge sáikes barlyq qajetti kómekti kórsetedi. Iaǵni, eshqandai artyqshylyq bolmaidy», - dedi Arman Qyryqbaev.
Sondai-aq ol barlyq memlekettik mekemeler, ásirese kóshi-qon qyzmeti shtattyq rejimde jumys istep, jaǵdaidy baqylaýda ustap otyrǵanyn basa aitty. Arman Qyryqbaev qajet bolǵan jaǵdaida 2 myńǵa jýyq tósek oryn daiyndalatynyn tilge tiek etti.
Almaty qalasy ákimdiginiń Open Almaty qoǵamdyq qabyldaýynyń táýlik boiy tegin koll-ortalyǵy jumys isteidi. Barlyq ózekti suraqtar boiynsha 1308 (mobildi qazaqstandyq uialy bailanys operatorynyń qońyraýy, tek Almaty qalasynda ǵana qoljetimdi) jáne +7 727 338 33 88 (qalalyq telefonnan qońyraý) telefondaryna habarlasýǵa bolady.
Budan basqa kóshi-qon salasyndaǵy memlekettik saiasatty iske asyrý máseleleri, shetel azamattarynyń Almaty qalasynyń aýmaǵynda bolý erejeleri boiynsha jedel jeli uiymdastyryldy: +7 727 254-43-17, +7 727 254-46-97.
