Almaty qalasynyń aýmaǵy sońǵy on jylda eki esege ósti, al qala turǵyndarynyń sany úshten birge artty. Bul týraly «Jańa Almaty» keshendi damý josparyn júzege asyrý qarqynyn talqylaý boiynsha arnalǵan dóńgelek ústel barysynda aityldy, dep habarlaidy QazAqparat.
Dóńgelek ústel jumysyna qala basqarmalarynyń basshylary men aýdan ákimderi qatysty.
Naýryzbai aýdanynyń ákimi Sanjar Toǵai aýdandy damytýdyń basym mindetteri úzdiksiz sýmen, elektr energiiasymen jáne gazben qamtamasyz etý ekenin aitty.
Búginde Naýryzbai aýdany 30% ortalyqtandyrylǵan sýmen qamtamasyz etilgen. Taǵy 20% 36 uńǵymadan sý alady. Halyqtyń qalǵan 50%-y Qaraǵaily, Quramys, Taýsamaly, Taýjoly, Tastybulaq, Aqjar, Qarǵaly shaǵyn aýdandaryn qamtityn Qarǵaly jáne Aqsai ózenderinen ashyq sý tartýdan sýdy paidalanady.
Sanjar Toǵai «Jańa Almatyny» damytýdyń Keshendi jospary aiasynda ortalyqtandyrylǵan sýmen jáne sý burýmen úzdiksiz qamtamasyz etý úshin 131,6 shaqyrym sý qubyry jáne 74,5 shaqyrym káriz qubyry salynǵanyn jetkizdi.
2022-2023 jyldary taǵy 74,5shaqyrym sý qubyry men 35,7 shaqyrym káriz qubyrlaryn salý jumysy aiaqtalady.
«Aýdanda Qarǵaly ózeninde jańa sý daiyndaý stantsiiasynyń qurylysy bastaldy, kelesi jyly jumysty aiaqtaýdy josparlap otyrmyz. Búginde «Qarǵaly» tazartý stantsiiasy táýligine 4 myń tekshe metr sý óndiredi. Jobany iske asyrǵannan keiin óndiristik qýat táýligine 15 myń tekshe metrge deiin ulǵaitylady. Ekinshi «Aqsai» tazartý stantsiiasy táýligine 22 myń tekshe metr sý óndiredi», - dedi aýdan ákimi.
Tastybulaq, Quramys, Qarǵaly, Taýjoly jáne Jailaý shaǵyn aýdandarynda injenerlik jelilerdi tartý jumystary tolyq aiaqtaldy.
Jaǵdaidy jaqsartý jáne aýdan turǵyndaryn kommýnaldyq qyzmettermen qamtamasyz etý úshin uzyndyǵy 34 shaqyrym kárizdik kollektordyń tehnikalyq-ekonomikalyq negizdemesin ázirleý jónindegi sheshim mańyzdy boldy, Kollektor qoldanystaǵy úi qurylystarynan jáne qosylǵan aýmaqtarda, sondai-aq Alataý aýdanynyń aýmaǵynan qosymsha salynyp jatqan sarqyndy sýlardy qabyldaýǵa múmkindik beredi.
Aýdan ákimi S. Toǵai 778 shaqyrym gaz jelileriniń tartylǵanyn, turǵyndardyń gazben 98% qamtylǵanyn aitty.
«Ótken jyly ákimdiktiń qoldaýymen kópbalaly jáne az qamtylǵan otbasylar turatyn 46 úi gaz júiesine qosylǵan bolatyn. Bul tájiribe 2021 jyly da jalǵasyn tapty, tek metsenattar esebinen muqtaj 20 otbasynyń úileri gazdandyryldy», - dedi Sanjar Toǵai.
Qalanyń ónerkásiptik áleýetin damytý bizneske tiisti injenerlik infraqurylymy bar jer ýchaskeleri beriletin indýstriialyq aimaqty damytýmen tyǵyz bailanysty.
Dóńgelek ústelge qatysýshylar Almaty qalasynyń aýmaǵy sońǵy on jylda eki esege óskenin jáne qala turǵyndarynyń sany úshten birge artqanyn tilge tiek etti.
