Almaty qalasynyń emhanalarynda 22 myńnan astam shetel azamaty tirkelgen, onyń 5 myńnan astamy – reseilikter, dep habarlaidy QazAqparat.
«Eger shetel azamaty Qazaqstan Respýblikasynyń aýmaǵynda turaqty turatyn bolsa nemese turýǵa yqtiiarhaty bolsa, ol mindetti meditsinalyq saqtandyrý júiesi jáne meditsinalyq kómektiń kepildik berilgen kólemi boiynsha kómek alýǵa quqyly. Búgingi tańda Almaty qalasynyń emhanalaryna 22 myńnan astam shetel azamaty tirkelgen. Olardyń ishinde Resei Federatsiiasynyń 5 myńnan astam azamaty bar», - dedi Respýblikalyq elektrondy densaýlyq saqtaý ortalyǵy Almaty qalalyq filialynyń direktory Gúlnár Ysqaqova óńirlik kommýnikatsiialar qyzmetiniń brifinginde.
Aitýynsha, ótken jyldyń 15 tamyzynan bastap sheteldikter men eńbek migranttary úshin alǵashqy meditsinalyq-sanitarlyq kómek kórsetetin uiymdarǵa tirkelý erejeleri ózgergen. Endi olarda erikti meditsinalyq saqtandyrý sharty bolýy kerek.
Aita ketsek, Qazaqstanda 15 qyrkúiekte erkin tańdaý arqyly alǵashqy meditsinalyq-sanitarlyq kómek uiymdaryna tirkelý naýqany bastaldy jáne ol 15 qarashaǵa deiin jalǵasady.
«Búginde Almatyda 73 uiym alǵashqy meditsinalyq-sanitarlyq kómekti kórsetedi. Onyń 40-y – memlekettik, qalǵany – jekemenshik. Búgingi tańda 6 jańa tapsyrys jetkizýshi alǵashqy meditsinalyq-sanitarlyq kómek kórsetýge jáne tirkeýge niet bildirdi», - dedi spiker.
Tirkelýdiń úsh múmkindigi bar: tirkelý naýqany aiasynda, erkin tańdaý jáne qonys aýdarýǵa bailanysty. Qajet bolǵan jaǵdaida ýchaskelik dáriger kómektesip, úide baqylap otyrýy úshin turaqty turǵylyqty jerde ornalasqan emhanany tańdaýdy usynady.
Almaty qalalyq qoǵamdyq densaýlyq saqtaý basqarmasynyń emdeý-profilaktikalyq is-sharalar bóliminiń basshysy Láilá Imanǵalieva naýqan barysynda alǵashqy meditsinalyq-saraptamalyq kómek uiymyna tirkelgen azamattar tek 2023 jyldyń 1 qańtarynda meditsinalyq kómek ala bastaitynyn aitty. Demek, 31 jeltoqsanǵa deiin olarǵa buryn tirkelgen emhanada qyzmet kórsetý jalǵasady.
