Almaty ákimdiginiń dári-dármekpen qamtamasyz etý jónindegi úilestirýshisi Zańǵar Sálimbaev shildeniń sońyna deiin megapoliske úsh millionnan astam ómirlik mańyzdy dári-dármek jetkiziletinin aitty, dep habarlaidy "Ult aqparat".
Onyń aitýynsha, shamadan tys suranys dári tapshylyǵyna ákelgen. Máselen, eger byltyr Almatydaǵy farmatsevter ótken aida shamamen 50 myń «Paratsetamol» satsa, biyl 260 myń qyzýdy túsiretin dári satyldy. Máseleni sheshý úshin Almaty qalasynyń ákimi Baqytjan Saǵyntaevtyń tapsyrmasymen óndirýshilermen, jetkizýshilermen, dárihanalar jelisimen jáne mamandandyrylǵan qaýymdastyqpen memorandýmǵa qol qoiyldy.
«22 maýsymnan bastap biz iri jetkizýshilermen, otandyq óndirýshilermen, distribiýtorlarmen, dárihanalar jelisimen jáne farmatsevtikalyq kompaniialarmen belsendi jumys jasaýdamyz. Olar kelisimge qol qoidy, onda iri jetkizýshiler, resmi distribiýtorlar Almaty qalasyndaǵy 105 dárihanaǵa áleýmettik mańyzy bar dári-dármekterdiń basym bóligin jetkizetin bolady», - dep túsindirdi Zańǵar Sálimbaev.
Jaǵdai Almaty ákiminiń baqylaýyna alyndy. Farmatsevtika naryǵynyń qatysýshylary dári-dármekter qory týraly jáne ákimdik sheshýge kómektesip jatqan qiyndyqtar týraly jedel túrde habarlap otyr. Atap aitqanda, ákimshilik kedergiler joiylyp, bizdiń naryqqa buryn kirmegen importtalǵan dárilerdi jedel sertifikattaý qolǵa alynbaq.
Zańǵar Sálimbaevtyń aitýynsha, 1 shildeden bastap qalalyq dárihanalarǵa 475 myń mańyzdy dári-dármek alyndy. Onyń ishinde paratsetamol, aspirin, ingavirin, azitromitsin jáne kardiomagnil bar.
«Shilde aiynyń sońyna deiin megapoliske úsh millionnan astam dári-dármek jetkiziledi. Onyń ishinde 2,2 million tabletka paratsetamol, 391 myń aspirin, 160 myń ibýprofen, 60 myń ingavirin, 99 myń azitromitsin jáne basqa da áleýmettik mańyzy bar dáriler. Úsh reis jetkiziledi. Erteń ushaq Reseiden, 12 jáne 15 shildede Úndistannan keledi», - dep tolyqtyrdy Z. Sálimbaev. Osylaisha, dári-dármek naryǵyndaǵy jaǵdai tolyǵymen turaqtandyrylady.
