Prezident Qasym-Jomart Toqaev Almaty qalasynyń ákimi Erbolat Dosaevty qabyldady, - dep habarlaidy "Ult aqparat" Aqordanyń resmi saityna silteme jasap.
Memleket basshysyna Almaty qalasynyń damýy men biylǵy qańtardaǵy qysqa merzimdi ekonomikalyq indikatordyń ózgergeni týraly esep berildi.
Prezidentke qalany qalpyna keltirý jumystary men zardap shekken kásipkerlerdiń shyǵynyn óteý sharalary týraly baiandaldy. Erbolat Dosaevtyń aitýynsha, Memleket basshysynyń tapsyrmasyn iske asyrý aiasynda bizneske jedel kómek kórsetý úshin jeńildetilgen tetik boiynsha tólem somasy 10 million teńgege deiin ulǵaitylǵan. Al ótinimderdi qaraý merzimi eki esege – 1 aidan 2 aptaǵa deiin qysqartylǵan. Qala ákimi qazirgi ýaqytta tirkelgen 1413 kásipkerdiń 755-i ótemaqy alǵanyn, 10-shy naýryzǵa deiin shaǵyn jáne orta biznes sýbektileri ótinimderiniń 90 paiyzy oryndalatynyn aitty.
Qasym-Jomart Toqaevqa áleýmettik mańyzy bar azyq-túlik taýarlarynyń baǵasyn turaqtandyrý, halyqtyń áleýmettik osal toptaryn qoldaý tiimdiligin arttyrý sharalary týraly aityldy.
Memleket basshysyna qalalyq densaýlyq saqtaý júiesin jańǵyrtý jáne mektepterde oryn tapshylyǵyn azaitý máseleleri jóninde málimet berildi.
Kezdesý qorytyndysy boiynsha Qasym-Jomart Toqaev qalany qalpyna keltirý jáne biznes sýbektilerine keltirilgen zalaldy óteý jumystaryn jandandyrýdy, injenerlik jelilerdi jańartý jóninde usynystar ázirleýdi, eski jáne apatty jaǵdaidaǵy turǵyn úilerdi azaitý úshin baspana qoryn qaita jóndeýge erekshe nazar aýdarýdy tapsyrdy.
