Almaty ákimdigi burynǵy «jemis konservi kombinaty» aýmaǵyndaǵy qurylys jobasyn toqtatty. Buǵan deiin qala turǵyndary osy aýdanda 57 kópqabatty úiden turatyn turǵyn úi kesheniniń qurylysyna shaǵymdanǵan bolatyn.
Qalalyq josparlaý jáne ýrbanistika basqarmasy baspasóz qyzmetiniń habarlaýynsha, O. Jandosov kóshesi № 94, № 94/16, № 94/8; Á. Kekilbaiuly kóshesi № 6; 20-liniia kóshesi № 39 mekenjaiyndaǵy qurylys toqtatyldy.
«Halyqqa qyzmet kórsetý obektileri bar kóppáterli turǵyn úi keshenin salýǵa arnalǵan jobalaý aldyndaǵy qujattama keri qaitaryp alyndy.Basqarmanyń usynysy boiynsha qurylys salýshy qurylys tyǵyzdyǵyn, qalalyq injenerlik jelilerge túsetin júktemeni eskere otyryp, jańa eskizdik jobany ázirleidi jáne usynady. Qujat jobasy barlyq qajetti protsedýralardan, sonyń ishinde qoǵamdyq talqylaýlardan ótedi»,-dep habarlady basqarmadan.
Budan basqa, qurylys salýshy eskizdik jobada áleýmettik nysandar, onyń ishinde jalpy bilim berý mekemeleri men mektepke deiingi bilim berý nysannyń bolýyn kózdeýi qajet.
«Osylaisha, atalǵan Almaty aýdanyndaǵy qurylysqa jol berilmeidi»,-dep atap ótti qalalyq josparlaý jáne ýrbanistika basqarmasy.
