19-20 qyrkúiek Qala kúnine orai Almatyda Panfilov jáne Jibek joly jaiaý júrginshiler kósheleri boiynda qala turǵyndary men qonaqtaryna arnalǵan aýqymdy Alma Qala Fest festivali ótedi, dep habarlaidy ult.kz.
Mádeni is-shara baǵdarlamasy Almatynyń tarihy men zamanaýi kelbetin tanystyrýǵa, ulttyq mádeniet pen dástúrdi dáripteýge, shyǵarmashylyq indýstriiany qoldaýǵa jáne qala turǵyndaryna túrli formattaǵy demalys usynýǵa baǵyttalǵan.
Festival aýmaǵynda birneshe taqyryptyq aimaqtar jumys istep, kelýshilerge mádeniet, óner, sport, ekologiia, tsifrlyq tehnologiialar, gastronomiia jáne balalarǵa arnalǵan oiyn-saýyq baǵyttaryndaǵy túrli baǵdarlamalarǵa qatysýǵa múmkindik beredi.
Festivaldiń negizgi bólikteriniń biri – alma sharýashylyqtarynyń jármeńkesi. Jármeńkege Almaty óńirindegi 50 alma sharýashylyǵy qatysyp, 200 tonnadan astam almanyń túrli sorttary men túrlerin usynady. Panfilov Qazybek bi kósheleri alańynda kelýshiler otandyq óndirýshilerdiń ónimderimen tanysyp, almanyń alýan túrinen dám tata alady.
«Almaty» kórme aimaǵynda qalanyń tarihyn, sáýletin, tabiǵatyn jáne ózindik kelbetin beineleitin kartinalar kórmesi uiymdastyrylady. Al Elshilikter alleiasynda qatysýshy memleketterdiń mádenieti men dástúrleri tanystyrylady. Kórme barysynda ulttyq óner, qolóner buiymdary, dástúrli mádeni qundylyqtar men túrli elderdiń erekshelikteri usynylady.
Festivaldiń zamanaýi aimaqtarynyń biri – Digital Zone. Munda tsifrlyq tehnologiialar men interaktivti jobalar usynylyp, Almaty tarihyna arnalǵan AI-aqparattyq-tanymdyq installiatsiialar jumys isteidi. Sonymen qatar kelýshiler arqan tartys, sadaq atý jáne basqa da interaktivti oiyndarǵa qatysa alady.
Eco Zone aimaǵy ekologiialyq bastamalar men jobalardy tanystyrýǵa arnalsa, Ethno Zone ulttyq mádeniet, dástúr jáne qolónerdi nasihattaidy. Etnoaimaqta qolónershiler jármeńkesi ótip, kelýshiler úshin túrli sheberlik sabaqtary uiymdastyrylady.
Belsendi demalysty unatatyndar úshin Sport Zone jumys isteidi. Munda sporttyq oiyndar, estafetalar jáne ulttyq oiyndar ótkiziledi. Balalarǵa arnalǵan arnaiy aimaqta kishkentai qonaqtar úshin oiyndar, animatorlar, batýttar, akvagrim, sabyn kópirshikteri, azottyq shoý jáne basqa da oiyn-saýyq baǵdarlamalary uiymdastyrylady. Festival qonaqtaryna qalanyń gastronomiialyq áleýetin tanystyratyn 25 qalalyq meiramhananyń arnaiy aimaǵy da usynylady.
Kinosúier qaýym úshin jeke kino aimaǵy jumys isteidi. Baǵdarlama aiasynda «Jas emes jubailar», «Mádi in China», «Synyptas», «Qolymnan usta», «Zaman Back», «Mafiia» jáne qazaq kinosynyń altyn qoryna engen filmder kórsetiledi. Sonymen qatar kórermender «Zaman Back» jáne «Familiia» filmderiniń akterlerimen arnaiy kezdesýge qatysa alady.
Festivaldiń mýzykalyq jáne shyǵarmashylyq baǵdarlamasy birneshe sahnada ótedi. Bas sahnada (Astana alańy) FEA «Otyrar sazy», MýzartLIFE, Raiym Ýaiys, «Ádemi ai» dýeti, Qudaibergen Bekish jáne Erkebulan Qumarov óner kórsetedi. Kishi sahna №1-de (T. Júrgenov atyndaǵy Qazaq ulttyq óner akademiiasy janyndaǵy sahna ) Áli Oqapov, Madi Rymbaev, Aqerke Amaliat, Nurmuhammed Jaqyp, «Hazar» toby, Daro jáne Venera Alpysbaeva óner kórsetedi. Al Kishi sahna №2-de (Jibek joly kóshesi) Live band Rockn rolla, immersivti qýyrshaq teatry, «Astra» toby, Nýrdaýlet Karlov, Alem Kýsainova jáne Azamat Torehan óner kórsetedi.
Ataýly merekelik is-sharalardyń ótýine bailanysty Tóle bi jáne Qazybek bi kósheleriniń Abylai han dańǵyly men Nazarbaev dańǵyly aralyǵyndaǵy ýchaskeleri 17 qyrkúiek saǵat 15:00-den bastap 21 qyrkúiek saǵat 03:00-ge deiin ýaqytsha jabylady.
