Premer-Ministrdiń birinshi orynbasary-Qarjy ministri Álihan Smaiylov memlekettik aýdit salasyndaǵy ońtaily qadamdardy atady, dep habarlaidy QazAqparat.
«2015 jyly «Memlekettik aýdit jáne qarjylyq baqylaý týraly» negizgi Zańnyń qabyldanýy Qazaqstan Respýblikasynda memlekettik aýdit júiesin qurýǵa bastama boldy. Memlekettik aýdit jáne qarjylyq baqylaý organdarynyń sertifikattalǵan qyzmetkerleri 2017 jyldan bastap memlekettik aýdit jáne qarjylyq baqylaý organdary qabyldaǵan jańa standarttar boiynsha memlekettik aýditti tolyqqandy iske asyrýǵa kiristi. Depýtattyq korpýspen júrgizilgen jumys nátijesinde 2018 jyly zańnamalyq baza jetildirildi jáne memlekettik aýdittiń odan ári damýyna túrtki boldy. Túzetýler paketi sybailas jemqorlyqqa qarsy mehanizmderdi kúsheitýge, memlekettik aýditorlardyń kadrlyq potentsialyn arttyrýǵa jáne elektrondyq aýditke kóshýge múmkindik berdi», - dep toqtaldy Á. Smaiylov Parlament Májilisindegi Úkimet saǵatynda.
Onyń sózine qaraǵanda, tórt jylda Ulttyq komissiia 1,5 myńnan astam memlekettik aýditor sertifikattaldy. Barlyq memlekettik ári atqarýshy organdarda ishki aýdittiń 54 qyzmeti quryldy. Atap aitqanda, memlekettik aýdit pen táýekelder boiynsha keńester otyrysy 79 ret ótkizildi.
«Sonymen birge, búginde qarjylyq eseptilik aýditi shoǵyrlandyrylǵan qarjylyq eseptilikte burmalaýǵa jol bermeý jáne kemshilikterdi der kezinde joiýǵa baǵyttalǵan. Buǵan ótken jyly qomaqty somada jasalǵan eskertýler dálel bolyp otyr. Tekserýlerdi qashyqtyqtan jasaý ádisiniń engizilýi aýdittiń quqyqtyq saýattylyǵyn kóterip, jemqorlyq táýekelderin tómendetti. Satyp alýlarda anyqtalǵan ereje buzýshylyqtardyń úlesi 19 paiyzdan 2 paiyzǵa deiin azaidy», - dedi Úkimet basshysynyń birinshi orynbasary.
