QR Premer-ministriniń orynbasary – Qarjy ministri Álihan Smaiylov Prezidenttik synaq jáne Prezidenttik kópsaiys federatsiialar odaǵynyń prezidenti bolyp sailandy, dep habarlaidy QazAqparat.
Elordada ótken odaqtyń kezekten tys otyrysynda QR Mádeniet jáne sport ministri Aqtoty Raiymqulova jańa sailanǵan odaq prezidentine qyzmette sáttilik tilep, atalǵan odaqtyń jumysynyń asa mańyzdy ekenine toqtaldy. Prezidenttik testilerdiń ult densaýlyǵyn saqtaý, óskeleń urpaqty salaýatty ómir saltyna shaqyrýda asa mańyzdy ekenin jetkizdi.
«2019 jyly Qazaqstan Respýblikasy Tunǵysh Prezidenti Elbasynyń testilerin tapsyrýdyń ekinshi toqsanyna elimizde 3 463 690 adam qatysyp, onyń ishinde 49387 adam Prezidentik deńgeidegi normativterdi, 145 222 adam ulttyq deńgeidegi normativterdi oryndady. Prezidenttik synaq jáne Prezidenttik kópsaiys federatsiialar odaǵy osylaisha joǵary nátijelermen «B» tobyna endi», - dedi ministr Álihan Smaiylovty quttyqtai otyryp.
Óz kezeginde Álihan Smaiylov Memleket basshysynyń halyqtyń densaýlyǵyn jaqsartýǵa óz Joldaýynda asa zor kóńil bólgenin atap ótti.
«Ol úshin buqaralyq sportty ary qarai damytýymyz kerek. Elimizdegi árbir azamattyń óz densaýlyǵy úshin sportpen ainalysqany óte mańyzdy. Buqaralyq sport túrleri piramida ispettes bolýy tiis. Eń joǵarǵy shyńynda chempiondar tursa, keiin belsendi ári saý jastar turýy tiis. Ultymyz myqty bolýy kerek. Búkil halyq úshin sporttyq infraqurylymnyń qoljetimdi bolǵany durys», - dedi Álihan Smaiylov elordanyń «Saryarqa» velogtreginde ótken odaqtyń kezekten tys otyrysynda.
