Búgin Úkimettiń keńeitilgen otyrysynda Qarjy ministri Álihan Smaiylov kóleńkeli ekonomikany joiý úshin qandai sharalar qabyldanatyndyǵyn aitty, dep habarlaidy QazAqparat tilshisi.
«Shyndyǵynda da Qytai Halyq Respýblikasy derekterimen aiyrmashylyq 6,9 mlrd dollardy quraidy. Onyń 3,3 mlrd dollaryn Qazaqstan arqyly shetelge ótetin tranzit qurap otyr. Qytai tarapy ony Qazaqstan eksporty retinde kórsetedi. Bul Resei men Qytai statistikalary arqyly dáleldengen. 1 mlrd dollar - bul Qazaqstan azamattarynyń «Qorǵas» ShYHO arqyly elimizge ákelgen taýarlary. 2,6 mlrd dollar - bul shynymen de deklaratsiialyq qunyn tómendetý. Biýdjettiń bir jylda joǵaltatyn qarajat 205 mlrd teńgeni quraidy», - dedi Qarjy ministr.
Álihan Smaiylov munsha qarajattyń biýdjetke túspei qalýyn boldyrmaý úshin naqty jumystar júrgizilip, keshendi sharalar qolǵa alynǵanyn aitty.
«Birinshiden, Qazirgi ýaqytta Qytai tarapymen deklaratsiiany elektrondy túrde alý úshin kelissóz júrgizip jatyrmyz. Ekinshiden, júkterdi Qazaqstan shekarasyndaǵy kólik-logistikalyq ortalyqtarda tieý máselesi talqylanýda. Sol jerde kedendik baqylaý júrgiziletin bolady. Úshinshiden keden organdarynda sitýatsiialyq ortalyqtar quramyz. Olar bizge bul máseleni túbegeili ózgertýge múmkindik beredi. Aǵymdaǵy jyldyń qorytyndysynda keden bóliginde biýdjetke qosymsha 200 mlrd teńge túspek», - dedi Álihan Smaiylov.
