QR Premer-Ministri Álihan Smaiylov Memleket basshysynyń tapsyrmasy boiynsha Almaty oblysynyń Qonaev qalasyna baryp, óńirdiń máslihat depýtattarynyń jinalysyna qatysty, dep habarlaidy "Ult aqparat" Úkimettiń baspasóz qyzmetine silteme jasap.
Álihan Smaiylov óz sózinde Prezident usynǵan jańa reformalar aiasynda jáne ótken referendýmnyń nátijeleri boiynsha elimizdiń saiasi júiesinde mańyzdy ózgerister bolǵanyn atap ótti.
Máselen, jańa norma qabyldanyp, endi oblystardyń, respýblikalyq mańyzy bar qalalardyń jáne astananyń ákimderin taǵaiyndaý jańa, ashyq jáne básekege qabiletti formatta ótedi.
Álihan Smaiylov depýtattarǵa QR Prezidentiniń Almaty oblysynyń ákimi laýazymyna Batyrjan Baijumanov pen Marat Sultanǵazievtiń kandidatýralaryn qaraýǵa engizý týraly hatyn oqyp berdi.
Ashyq daýys berý nátijesi boiynsha 188 depýtattyń 129-y Marat Sultanǵazievtiń kandidatýrasyna, 59 depýtat Batyrjan Baijumanovqa daýys berdi.
Oblys aktivine Marat Sultanǵazievti tanystyra otyryp, Álihan Smaiylov QR Prezidenti óńir basshylyǵynyń aldyna birqatar mańyzdy mindetter qoiǵanyn, onyń ishinde oblystyń basqarý organdaryn Qonaev qalasyna kóshirý, odan ári ekonomikalyq damý jáne áleýmettik problemalardy sheshý jónindegi mindetterdi belgilep bergenin atap ótti.
«Bizdiń negizgi maqsatymyz – azamattardyń ál-aýqatyn arttyrý, áleýmettik jaǵdaiyn jaqsartý. Ol úshin jańa investitsiialyq jobalardy iske asyrý arqyly jańa jumys oryndaryn ashý kerek. Oblys ákimi iri investorlardy tartý úshin qolaily jaǵdailar jasaýǵa jáne qoldanystaǵy indýstriialyq aimaqtardyń áleýetin barynsha paidalanýǵa erekshe nazar aýdarýy kerek», — dedi Premer-Ministr.
Sondai-aq Úkimet basshysy óńirdiń aýmaqtyq ornalasý artyqshylyqtaryn barynsha paidalanyp, aýyl sharýashylyǵy ónimderin óndirý men qaita óńdeýdi damytý, Almaty mańynda azyq-túlik beldeýin qurý qajettigin atap ótti.
Sonymen qatar Álihan Smaiylov oblystyń týristik klasterdi damytý áleýeti de joǵary ekenin atap ótti. Ol óńirdiń ekonomikalyq ósýiniń negizgi draiverleriniń biri bola alady.
«Halyqty sapaly aýyz sýmen, tabiǵi gazben qamtamasyz etý, elektrmen jabdyqtaý, joldar men áleýmettik nysandardy jańǵyrtý, turǵyn úi problemalaryn sheshý jáne mektepterde úsh aýysymmen oqytýdy joiý jónindegi jumysty jalǵastyrýdyń mańyzy zor», — dedi Premer-Ministr.
Sonymen qatar Úkimet basshysy jergilikti atqarýshy organdardyń jumysy halyqpen tiimdi dialogqa negizdelýi tiis ekenin atap ótti.
