Elimizdiń jańa taǵaiyndalǵan Premer-Ministri Álihan Smaiylov Úkimettiń aldaǵy jumys josparymen tanystyrdy, dep habarlaidy QazAqparat tilshisi.
«Asa qurmettti Prezident myrza, qurmetti depýtattar! Maǵan úlken senim artqandaryńyz úshin alǵysymdy aitamyn. Bul - men úshin zor jaýapkershilik. Qazirgi kezde Memleket basshysynyń jetekshiligimen eldiń egemendigi men ulttyq qaýipsizdikti, beibitshilik pen kelisimdi nyǵaitýǵa, halyq únine qulaq asatyn memleketke baǵyttalǵan ózgerister júzege asyp jatyr. Azamattardyń zańdy talaptary eskerilip, iske asatyn bolady. Qasym-Jomart Kemeluly eldegi áleýmettik-ekonomikalyq jaǵdaidy turaqtandyrý, halyqtyń turmysyn jaqsartý týraly tapsyrmalaryńyz Úkimet úshin basym mindet bolady», - dedi Álihan Smaiylov Májilis otyrysynda.
Onyń aitýynsha, el Úkimetin aýqymdy jumys kútip tur.
«Úkimet Prezidenttiń joldaýlaryn, bastap jatqan reformalaryn jáne tapsyrmalaryn, strategiialyq jáne baǵdarlamalyq qujattardy iske asyrý jumystaryn júrgizetin bolady. Tiimdi makroekonomikalyq saiasatty júzege asyrý jahandyq ózgeristerdiń áserine ushyraǵan infliatsiiany birtindep tómendetý jáne makroekonomikalyq turaqtylyqty qamtamasyz etý mańyzdy mindetteri tur. Biznes klimatty jaqsartý, halyqty jumyspen qamtý men jalaqyny kóterý jónindegi keshendi sharalar azamattardyń naqty tabysynyń ósýine yqpal etedi. Úkimet jumysynyń basty maqsaty – halyqtyń ál-aýqatyn arttyrý. Sondyqtan memlekettik biýdjet tiisti sharalarǵa kózdeletin bolady. Aldymyzda áli koronavirýsty meńgerý mindeti tur. Úkimettiń aldyna qoiylatyn mindetterdi sheshý úshin barlyq kerekti sharalar qabyldanatyn bolady», - deidi ol.
