Amerikalyq otbasy asyrap alǵan etnikalyq qazaq qyzy Eija Berger óziniń biologiialyq ata-anasyn izdeidi, dep habarlaidy QazAqparat.
«Meniń atym - Eija. Bul asyrap alǵan ata-anam bergen esim. Bastapqydaǵy aty-jónim Saltanat Ashqynova bolǵan. Meni Semei qalasynan 2001 jyly 16 ailyq kezimde asyrap alǵan. Ózimniń biologiialyq ata-anamdy tabýǵa sheshim qabyldadym. Ata-anamdy tabýǵa degen niet barlyq ýaqytta da bolǵan edi», - dedi boijetken Facebook paraqshasynda jýrnalist Talǵat Almanovqa bergen suhbatynda
Eija biologiialyq ata-anasyn izdeitindigin Facebook-tegi Kazakh American Association (Qazaqstandyq-amerikalyq qaýymdastyq) pabliginde jazǵan-dy.
«Meniń tegim - Berger (Berger), Floridada turamyn. Eki ápkem bar, otbasydaǵy ortanshy balamyn, jasym 20-da. Kolledjde bilim alyp jatyrmyn. Otbasymyz óte tatý, biz ýaqytty birge ótkizgendi jaqsy kóremiz», - dep atap ótedi ol.
Onyń aitýynsha, barlyq ýaqytta da ózin asyrap alǵandyǵyn bilgen. Muny amerikalyq ata-anasy da jasyrmaǵan.
«Ata-anam asyrap alý protsesi jaiynda aitqan bolatyn. Biraq, kóp mán-jaidy egjei-tegjeili bilmeimin. Eń bastysy protsestiń óte kóp kezeńnen turǵandyǵyn aitqan. Bastapqyda men olardyń josparynda bolmaǵan ekenmin. Ata-anam kishkentai ul bala asyrap alýǵa niettengen. Osylaisha, men tosyn tańdaý bolyppyn», - dedi Eija.
Sonymen qatar, ol týǵan ata-anasyn izdeýge nelikten sheshim qabyldaǵandyǵyn da aityp berdi.
«Barlyq ýaqytta qolym bos bolǵan emes. Jaqsy kóretin otbasym, jaily ómirim bar. Biraq, eseiip, táýelsiz bola túskenimdi túsinemin. Sheshimimdi ápkelerim de qoldap otyr. Biologiialyq ata-anama eshqandai jat sezimim, ókpe-renishim joq. Esh ýaqytta kiná taqpaimyn da», - dedi Eija.
Qazirgi ýaqytta óner mektebinde bilim alyp, sán inýstriiasyndaǵy menedjment pen marketingtiń qyr-syryn meńgerip júrgen Eija týǵan anasymen kezdesken sátte ne aitýy múmkin ekendigimen de bólisti.
«Anama ne aitarymdy ázirshe bilmeimiz. Eger, birdeńe aitar múmkindigim týatyn bolsa, onda alǵysymdy bildiretin edim. Ol meni, óziniń týǵan balasyn bireýge berýge májbúr bolǵanyna ókinemin. Qujattarǵa sáikes men biologiialyq anamnyń ekinshi balasy ekenmin. Oǵan rahmetimdi aitarmyn. Sebebi, qazirgi ómirim tamasha», - dedi ol.
Suhbat barysynda Eijaǵa týǵan anasynyń esimi - Quralai Ashqynova, al ákesiniń aty Qýat Ashqynov ekeni aityldy.
