Mańǵystaýda kóktaiǵaqtan bes adam qaza tapqan is boiynsha alǵash ret jol qyzmetiniń basshysy sottaldy, dep habarlaidy ult.kz.
Mańǵystaý oblysynyń Beineý aýdandyq soty bes adamnyń ómirin qiǵan jol apatyna qatysty qylmystyq is boiynsha úkim shyǵardy. Bul – Qazaqstanda avtojoldy qys mezgilinde tiisinshe kútip ustamaǵany úshin adam ólimine bailanysty qylmystyq jaýapkershilikke tartylǵan alǵashqy is.
Qaiǵyly oqiǵa 2026 jylǵy 16 qańtarda respýblikalyq mańyzy bar «Dossor – Qulsary – Beineý – Sai-Ótes – Shetpe – Jetibai – Aqtaý» tasjolynda bolǵan. Kóktaiǵaq saldarynan Yutong jolaýshylar avtobýsy joldan shyǵyp ketip, aýdarylǵan. Apattan bes adam qaza taýyp, taǵy 14 jolaýshy túrli dene jaraqatyn alǵan.
Isti Bas kólik prokýratýrasynyń arnaiy prokýrorlary tergedi. Tergeý barysynda jol-kólik oqiǵasyna avtojoldyń qysqy kezeńde talapqa sai kútip ustalmaýy sebep bolǵany anyqtaldy. Sondai-aq jaýapty tulǵalardyń áreketsizdigi men oryn alǵan aýyr saldardyń arasynda tikelei sebep-saldarlyq bailanys bary dáleldengen.
Sot «KAJServis» JShS Mańǵystaý oblystyq filialynyń №57 jol paidalaný bólimshesiniń bastyǵyn Qylmystyq kodekstiń 353-babynyń 4-bóligi boiynsha kináli dep tanydy. Oǵan 2 jyl 6 ai merzimge shartty túrde bas bostandyǵynan aiyrý jazasy taǵaiyndaldy.
Aita keteiik, sot úkimi ázirge zańdy kúshine engen joq.
