Sońǵy jyldary Qazaqstanda áleýmettik kásipkerlik oń qarqynda damyp keledi. Bul týraly qoǵam qairatkeri, áleýmettik kásipker Emin Askerov aitty, dep habarlaidy QazAqparat.
Aita keteiik, búgin Aqparat jáne qoǵamdyq damý ministri Aida Balaeva úkimettik emes uiym ókilderimen kezdesti. Is-shara jyl saiyn 27 aqpanda atap ótiletin Dúniejúzilik úkimettik emes uiymdar kúni aiasynda ótti.
«Shyn máninde qoǵamdyq uiymdardyń róli óte zor. Sebebi olar barlyq saladaǵy túrli máselelerdi sheshý boiynsha ózderine jaýapkershilikti alýǵa qaýqarly. Búgin Dúniejúzilik úkimettik emes uiymdar kúni aiasynda kezdesý ótti. Osy oraida saladaǵy problemalardy, aldaǵy ýaqytta jasalatyn qadamdardy talqyladyq. Jalpy, azamattyq sektordyń ósip kele jatqany qaýantarlyq jaǵdai. Úkimettik emes uiym sektorynda qyzmet etýge daiyn adamdar kóptep tartylyp otyr. Olar qoǵamnyń áleýmettik mańyzdaǵy máselelerin birlese sheshýge múddeli», - dedi Emin Askerov.
Onyń paiymynsha, elimizde áleýmettik kásipker baǵyty ońtaily damyp kele jatyr.
«Men áleýmettik kásipkerlik salasynyń ókili bolyp sanalamyn, bul turǵyda úlken baǵyttar qamtylǵan. Elimizde áleýmettik kásipkerler sany artyp keledi, olar memlekettik sipattaǵy máselelerdi ózderiniń kúshimen sheshýge daiyn. Jalpy, Qazaqstanda áleýmettik kásipkerlikti damytý trendi bar. Biylǵy shilde aiyna qarai áleýmettik kásipkerlik týraly zań jobasy bolady dep kútip otyrmyz. Sonymen qatar, áleýmettik kásipkerlerge magistratýra bar. Sońǵy jyldary bul salada eleýli jaqsy jańalyqtar kóbeiip keledi», - dedi ol.
