Áleýmettik mańyzy bar azyq-túlik taýarlary qunynyń negizsiz ósýine jol bermeý qadamdary qandai. Osy oraida jaýapty vedomstvo bul baǵyttaǵy jumystarǵa túsinik berdi, dep habarlaidy "Ult aqparat".
«Áleýmettik mańyzy bar azyq-túlik taýarlarynyń (ÁMATT) ózindik qunynyń ósýin tejeitin quraldardyń biri - baǵa shekterin engizý.
Qazirgi ýaqytta ÁMATT tizimine 19 ónim kiredi: un, nan, jumyrtqa, qaraqumyq, kúrish, qant, kúnbaǵys maiy jáne sary mai, keibir et túrleri (siyr, taýyq), sút ónimderi (sút, airan, súzbe), kókónister (kartop, sábiz, piiaz, qyryqqabat) jáne tuz. Baǵa shegin jergilikti atqarýshy organdar belgileidi. Ákimdikter ár ónimniń baǵasyn aimaqtaǵy ÁMATT tiziminen esepteidi jáne bekitedi. Budan ári bekitilgen baǵalardyń dúkenderdegi naqty baǵamen sáikestigin ákimdikter de baqylaidy», - delingen Saýda ministrligi Tutynýshylardyń quqyqtaryn qorǵaý komitetiniń málimetinde.
Shekti baǵadan asqan jaǵdaida saýda sýbektilerine ákimshilik jaýapkershilik qarastyrylǵan. Sonymen, eger osyndai fakt anyqtalsa, aiyppul 100 AEK, eger qaitalansa - 200 AEK quraidy.
Ákimshilik aiyppuldardy jergilikti atqarýshy organdar salady.
Óz kezeginde Saýda ministrligi memlekettik organdardy aimaqtardaǵy ÁMATT baǵalaryn belgileý máseleleri boiynsha úilestiredi.
Atap aitqanda, satýshynyń marjasy óndirýshiniń satý baǵasynan nemese kóterme saýda jetkizýshiniń satyp alý baǵasynan 15% aspaýy kerek.
«Saýda-sattyqtyń maksimaldy ústeme erejelerin, baǵa shekterin buzýshylyqtarǵa jedel jaýap berý nemese áleýmettik mańyzy bar azyq-túlik taýarlarynyń negizsiz qymbattaý jaǵdailaryn anyqtaý úshin, Saýda jáne integratsiia ministrligi Qazaqstan Respýblikasyndaǵy bólshek saýda obektilerindegi baǵalardy únemi qadaǵalap otyrady. Jedel jáne senimdi aqparat alýdyń mańyzdy arnalarynyń biri - Dosmart.kz keshbek-qyzmeti: árbir qazaqstandyq tamaq ónimderin satyp alǵandyǵy týraly túbirtektiń fotosýretin jibere alady jáne uialy telefon shotyna 1% deiin keshbek alady. Jinaqtalǵan aqparat ministrlikke kelip túsedi, bul bizge baǵany kóterý faktileri týraly tiisti ákimdikke shara qoldaný úshin habarlaýǵa múmkindik beredi», - dep atalyp ótken vedomstvo habarlamasynda.
Tutynýshylar áleýmettik mańyzy bar azyq-túlik taýarlarynyń baǵasy kóterilgen jaǵdaida, jergilikti atqarýshy organǵa júgine alady.
Baǵany turaqtandyrý jáne baǵanyń kúrt ósýine jol bermeitin júielik qadamdardy ázirleý maqsatynda Saýda ministrligi múddeli memlekettik organdarmen birlesip Jol kartasyn ázirledi. Qarastyrylǵan is-sharalar qoldanystaǵy mehanizmderdi jetildirýge, óndiristi ulǵaitýǵa jáne kásiporyndardy qoldaýǵa, zańnamalyq ózgeristerge baǵyttalǵan.
