Áleýmettik kásipkerlikti damytýdy kózdeitin zań jobasy osy aida Parlamentte tanystyrylady. Bul týraly QR Parlamenti Senatynyń Tóraǵasy Máýlen Áshimbaev aitty, dep habarlaidy "Ult aqparat".
«Qazirgi tańda elimizde áleýmettik kásipkerlik salasy aitarlyqtai damyp keledi. Kóptegen joba qolǵa alynyp, tyń bastamalar iske asyrylyp jatyr. Soǵan orai búgin áleýmettik kásipkerlermen arnaiy kezdesip, áleýmettik jobalarmen jáne osy baǵytta kadr daiarlaý máselesimen tanystyq. Jalpy, bul salada memleket tarapynan aýqymdy jumys istelip jatqany belgili. Múmkindigi shekteýli azamattardy qoldaýǵa arnalǵan baǵdarlamalar men olardy jumyspen qamtýǵa qatysty jeńildikter de bar. Biraq onyń bári máseleni tiisti deńgeide sheshýge jetkiliksiz», - dep jazdy Senat spikeri Facebook-paraqshasynda.
Osy rette ol áleýmettik kásipkerliktiń bereri mol ekendigin basa atap ótti.
«Óitkeni, bul – mańyzdy áleýmettik máselelerdi sheshý jolynda memlekettiń, azamattyq sektordyń jáne kásipkerlerdiń resýrstaryn ortaq maqsatqa jumyldyratyn sala. Sonymen qatar áleýmettik kásipkerliktiń qoǵamnyń azamattyq jaýapkershiligin qalyptastyrýǵa tigizetin yqpaly zor. Sebebi, bul sala tabys taba otyryp, az qamtylǵan, kómekke muqtaj jandarǵa qoldaý kórsetýdi dáripteidi. Sondyqtan áleýmettik kásipkerlikti damytýǵa, ony qoldaýǵa Memleket basshysy basa mán berip otyr»,- dedi Máýlen Áshimbaev.
Onyń atap ótýinshe, Prezident tapsyrmasyna sáikes Parlament depýtattary Úkimetpen jáne tiisti ministrliktermen birlesip, arnaiy zań jobasyn daiyndady. Jumys barysynda áleýmettik kásipkerler men sarapshylardyń pikirleri eskerilgen. Qujat osy naýryz aiynda Senatta kópshilikke tanystyrylyp, keiin Májilistiń qaraýyna jiberiledi.
«Zań jobasynda eki mańyzdy máseleniń sheshimi qarastyrylǵan. Aldymen, áleýmettik kásipkerlikke naqty anyqtama beriledi. Áleýmettik kásipkerler degen kim, olardyń mindeti qandai bolý kerek degen suraqtardyń bárine zań jobasynda jaýap jazylady. Sondai-aq, qujatta áleýmettik kásipkerlerge arnalǵan qoldaýdyń tetikteri kórsetiledi. Naqty aitqanda, salyq tóleýde jeńildikter qarastyrý, memleket tarapynan infraqurylymmen qamtamasyz etý, osy salanyń qyr-syryn úiretetin treningter uiymdastyrý siiaqty birqatar qoldaý sharalary usynylyp otyr. Aldaǵy ýaqytta zań qabyldanyp, elimiz áleýmettik kásipkerlikti damytýdyń jańa deńgeiine kóteriledi dep senemiz», - dedi Senat Tóraǵasy.
