Álemniń eń úzdik illiýzionisteri Qazaqstanda tuńǵysh ret tańǵajaiyp siqyrlarǵa toly shoý usynady, dep habarlaidy «Ult aqparat» Bnews.kz portalyna silteme jasap. Astanada ótken baspasóz jiynynda ártister bul keshten ne kútýge bolatynyn aityp, ózge de qyzyqty jáittarmen bólisti.
Búgingi kúnge deiin 200 shaqty qalany ainalyp ótip, 25 memlekette óner kórsetken "Illiýzionister" shoýy endi qazaq kórmenin tań qaldyrmaq.
Aýqymdy shara 6-7 qazanda Astanadaǵy EXPO Kongress-ortalyǵynda ótip, al 10-11 kúnderi Almatydaǵy Respýblika Saraiynda jalǵaspaq.
Prodiýser Simon Peinterdiń aitýynsha, shoýdyń jańa nusqasynda 7 illiýzonist óner kórsetedi. Olar: falsifikator Harrison Grinbaým, shoýmen Mark Kalin, siqyrshy Djinjer Lait, umytylmas Enzo, "sheber qashqyn" Krendl, manipýliator Sebastian Nikolas jáne qarý sheberi Robin Sharp.
Ártister tobynyń ereksheligi – olardyń ár eldiń ókili, sonymen qatar tańǵajaiyp magiia iesi bolýynda. Mysaly, qarý sheberi Robin Sharp arbaletpen ártúrli qimyl-áreket istei alady. Degenmen, bul, shoýdyń eń qaýipti triýgi.
Siqyrshy Djinjer siz oilaǵannan da "úlken siqyrlarǵa" jaýap beredi.
«Men otpen jumys isteimin. Levitatsiia da – meniń ádisim. Odan bólek sharlardy sahna hám zal ishinde ushyra alamyn. Ózim de sahna ishimen ushyp, kórermenmen bailanys ornatqandy jaqsy kóremin», - deidi ártis.
"Sheber qashqyn" Kendl kisennen úsh minýt ishinde qalai bosap shyǵýǵa bolatynyn kórsetse, manipýliator Sebastian "qol magiiasymen" tań qaldyrady. .
"Meniń magiiamnyń kúshi – qolda. Men zattardy joq qylyp, qaita shyǵara alamyn. Sonymen qatar olardy túrlendiremin", - deidi Sebastian.
Erli-zaiypty Mark Kalin men Djinjer Lait bolsa, eń áigili triýkterdiń biri "áieldi aramen bólshekteýdi" kórsetpek.
"Keide triýk jospar boiynsha jalǵaspai qalatyn kezder bolady. Sondai bir kúnderdiń birinde men azdap úlgere almai janyǵyp, saýsaǵymdy kesip aldym. Odan belgi de qaldy. Biraq bul oqiǵadan soń biz qateligimizdi túsinip, onymen jumys jasadyq. Tájiribemizdi shyńdai tústik", - dedi Djinjer Lait óz sózinde.
Jalpy alǵanda, illiýzionister Qazaqstan halqy úshin buryn-sońdy bolmaǵan shoý daiyndap kelgen. Olar ázirge bútin qupiiany ashpaýǵa kelisken.
"Asylynda, men sahnada óte kóp sóileimin. Óitkeni komikpin. Keide aýdarmamen qiyndyqtar, túsinispeýshilikter týyndaidy. Sol sebepti men kóbine vizýaldy amal-ádisterge kúsh salamyn. Sóitip tildik shekarany buzýǵa tyrysamyn. Qazaqstan úshin arnaiy "qazaqstandyq beinejazba" daiyndadyq", - deidi falsifikator Harrison Grinbaým.
Baspasóz jiynynyń sońynda ártister óz kórermenin zeriktirip almaitynyna ýáde berdi. Olardyń aitýynsha, teledidardaǵyny sahnadaǵy shynaiy kórinistermen salystyrýǵa bolmaidy.
"Bizdiń shoý – vizýaldy. Kórermenmen kóp pikirlesetinimizge qaramastan, biz ýaqytta jaqsy ótkizýge tyrysamyz. Shoýdy óz kózińmen kórgenge ne jetsin! Teledidar men kinoda kórgenderińdi jaqynnan baqylap, tamsanatyn bolasyńdar!", - dep túiindedi siqyrshy Djinjer Lait.
Illiýzionister Qazaqstanǵa kelip, óner kórsetý ózderi úshin úlken abyroi ekenin aityp, sahnaǵa kóteriletin kúnderin asyǵa kútetinderin jetkizdi.
