Qaraǵandyda jýrnalisterdiń eń úzdik jumystaryn kórsetýge arnalǵan "World Press Photo-2018" kórmesiniń ashylý saltanaty ótti. Is-shara kezinde jýrnalisterge arnap baspasóz sapary uiymdastyrylyp, onda kórme tálimgeri, "World Press Photo" ókili Anna Mehr ótken jyldyń eń mańyzdy oqiǵalaryn mazmundaityn eń úzdik sýretterdi tanystyrdy.
Kórme 2018 jyldyń 10 jeltoqsanyndaǵy Halyqaralyq adam quqyǵy kúnine orai ashylyp otyr. Biyl 125 elden 4,5 myń fotosýretshiniń 73 myńǵa jýyq sýreti baiqaýǵa jiberildi. Ortasha eseppen alǵanda jyl saiyn kórmeni tamashalaýǵa 45 eldiń 100 qalasynda eki millionǵa jýyq adam keledi. Kórme beikommertsiialyq sipatta ótedi.
Biyl jeńimpazdar men júldegerler qataryna 42 adam kirip otyr. Is-shara uiymdastyrýshylary – Niderland Koroldiginiń elshiligi, Soros-Qazaqstan qory jáne «Erkindik qanaty» Qoǵamdyq qory. Ashylý saltanatynda alǵash bolyp Qazaqstandaǵy Niderland elshisi Dirk Ian Kop sóz aldy. «Niderland Elshiligi World Press Photo kórmesin Qazaqstanda osymen úshinshi márte uiymdastyryp otyr. Biyl kórme 4 qalada ótýde. Sóz bostandyǵy kóz bostandyǵynan bastalady», - dep atap ótti ol.
Osyǵan deiin kórme Astana, Almaty, Qaraǵandy jáne Óskemende 2013 jáne 2014 jyldary ótkizilgen bolatyn. Biyl da kórme Qazaqstannyń tórt qalasynda – Astana, Qaraǵandy, Almaty jáne Shymkentte ótip jatyr. Kórme árbir qalada eki aptaǵa sozylady.
«Jyldyń fotosýreti-2018» bas atalymynda Venesýeladan qatysqan fotosýretshi Ronaldo Shemidtiń jumysy jeńiske jetti. Onyń fotosýretinde 2017 jyldyń 3 mamyrynda Karakastaǵy úkimetke qarsy buqaralyq sherýge qatysqan, gaztutqysh kiip júgirip bara jatqan 28 jasar Hose Viktor Salasar Balsa beinesi túsirilgen.
Ashylý saltanatynda Soros-Qazaqstan qory basqarma tóraǵasy Anton Artemev qor bilim berý jáne kórmelik jobalar arqyly qazaqstandyq fotodokýmentalistikany damytýǵa baǵyttalǵan jobalarǵa talai márte qoldaý kórsetip kele jatqandyǵyn atap ótti. Onyń mysaly retinde ol NOOR Foundation uimdastyrǵan vizýaldy storitelling vorkshobyn keltirdi. Bul jas qazaqstandyq fotosýretshilerdiń kórmesi aiasynda fotoderekti jobalar ótken jyly Almatyda ótken «20 jyldan keiin» atty kórmeniń bir bóligine ainaldy.
«Biyl Qazaqstandaǵy World Press Photo kórmesi sheberlerdiń jumystaryn tamashalap qana qoimai, sonymen birge, olardan sheberlik sabaqtar kezinde úirenýge múmkindik bermek. Osy kórmeni óz elimizde uiymdastyrý biz úshin úlken qurmet. Qazaqstandyqtar búkil álemdi ózine qaratyp, ujymdyq zerdeniń bir bóligine ainalǵan fotosýretterdi óz kózimen tamashalai alatyndyǵyna qýaynshtymyz», - dep atap ótti Soros-Qazaqstan qory basqarma tóraǵasy Anton Artemev.
Biyl tuńǵysh ret kórme aiasynda uiymdastyrýshylar «Fotosýret qoǵamdaǵy áleýmettik máselelerdi kórsetýge, sondai-aq, adam quqyǵy men sóz bostandyǵyn áspetteýge arnalǵan qural retinde» degen taqyrypta ataqty fotosýretshi Valerii Melnikovtyń kásibi fotosýretshilerge jáne derekti fotosýretterdi súietin qaýymǵa arnalǵan sheberlik sabaǵyn ótkizeiin dep otyr. Sheberlik sabaqtar 2 qalada – Astana jáne Almatyda ótedi.
Aita ketsek, World Press Photo qory 1995 jyldan bastap Niderland Koroldigi hanzadasynyń qamqorlyǵymen jumys jasap kele jatqan táýelsiz fotojýrnalistikaǵa jáne búkil álemde erkin aqparat bólisýge arnalǵan biregei alań bolyp tabylady. Kásibi fotosýretshilerden jáne BAQ fotoredaktorlarynan turatyn táýelsiz halyqaralyq qazylar alqasy jyl saiyn jer júziniń túkpir-túkpirinde jumys jasaityn fotojýrnalisterdiń, agenttikterdiń, gazet pen jýrnaldardyń úmitkerleriniń jumystaryn 9 túrli sanatta baǵalaidy. Baiqaý nátijeleri jariialanǵan soń jyl saiyn Amsterdamda eki ai boiy World Press Photo 2018 jeńimpazdarynyń jumystary kórsetiledi, keiin bul sýretter búkil álemdi saiahattaýǵa jiberiledi.
World Press Photo halyqaralyq fotobaiqaýynda jeńiske jetken jumys kórmeleri aiasynda Niderland Koroldiginiń Elshiligi 2018 jyldyń 10 jeltoqsanyndaǵy Halyqaralyq Adam quqyǵy kúnine orai áleýmettik mańyzǵa ie taqyryptarǵa arnalǵan fotosýretter onlain-baiqaýyn uiymdastyrady.
