Álemde koronavirýstan qaitys bolǵandar sany 5 million adamǵa jetti, dep habarlaidy QazAqparat VVS agenttigine silteme jasap.
Djons Hopkins ýniversitetiniń málimetinshe, dúisenbi tańyndaǵy jaǵdaiǵa sáikes, álemde koronavirýstan qaitys bolǵan adamdar sany 5 million adamnan asyp jyǵylǵan. Tirkelgen ólim jaǵdailarynyń jartysyna jýyǵy tabysy ortashadan joǵary nemese joǵary, ǵalamshar turǵyndarynyń segizden bir bóligi turyp jatqan elder úlesinde (AQSh, EO elderi, Braziliia). AQSh-tyń bir ózinde qaýipti virýstan 740 myńnan astam adam qaitys bolǵan.
Sarapshylar koronavirýs 1950 jyldan beri bolyp jatqan barlyq álemdik janjaldarmen birdei adam ómirin qiyp áketti, adam óliminiń júrek-qantamyr aýrýlary men insýlttan keiingi úshinshi basty sebebine ainaldy dep sanaidy.
Bul rette ǵalymdar 5 mln – naqty sannan áldeqaida tómen ekenine senimdi, sebebi indetten qaitys bolǵandardyń barlyǵy birdei koronavirýsqa test tapsyrǵan joq. Al meditsinalyq kómeksiz úiinde kóz jumǵandar sol kúiinde tirkelmei qalǵan.
Pandemiia bastalǵaly 22 aidyń ishinde aýrýǵa shaldyǵý oshaqtary da aýysyp otyrǵan. Qazirgi kezde virýs ásirese, vaktsinalaýǵa qarsy teris aqparat tarap, halqy bilik kózderine senimsizdik tanytqan Resei, Ýkraina jáne Shyǵys Eýropanyń basqa elderinde tez taralyp jatyr.
