Álem elderi qarttar men jetimder úiin biriktire bastady, dep jazady Habar 24.kz.
Portaldyń jazýyna, qazir álemniń birqatar elinde qarttar men jetimder úiin biriktirý qarqyndy damyp keledi. Mysaly, Ulybritaniiada osyndai ortalyqtyń ashylǵanyna 1 jyldai bolǵan. Balalar men eresekter bir úide qalai turyp jatyr, bul ádistiń artyqshylyǵy nede?
Nightingale House ortalyǵy London qalasynda ornalasqan. Bul - Ulybritaniiadaǵy qaraýsyz qalǵan qarttar men jetim balalar turatyn eń alǵashqy oryn. Munda olar kún saiyn birge ýaqyt ótkizip, áńgimelesedi.
Túrli býyn ókilderin bir ǵimaratta baǵyp-qaǵý ideiasy 1976 jyly Tokio qalasynda paida boldy. Al alǵash bolyp bul tájiribeni AQSh engizdi.
«Mundai ádistiń paidasy kól-kósir», - deidi sala mamandary.
Zertteý nátijesi kórsetkendei, mundai qarym-qatynas egde jastaǵylardyń densaýlyǵyna oń áser etedi. Aitýlarynsha, kún saiyn kishkentai búldirshindermen sóilesken qariianyń kóńil-kúii jaqsaryp, jalǵyzdyq sezimi umtylyp, qan qysymy retteledi. Olar birge mýzyka, bi, sýret salýmen ainalysyp, áńgime-dúken quryp, tamaq daiyndaidy. Osylaisha meiirimge zárý balalar mahabbatqa bólenip, al úlkender ónegesin olarǵa miras etedi.
«Balalar kelmes buryn bul jer mazarǵa uqsaityn. Olar bizdi energiiasymen qýattap, ómirge degen qulshynysty oiatady. Jasaryp qalamyz. Ózimniń balam joq. Aitaiyn degenim: bul tájiribe maǵan qatty unady», - deidi qarttar úiiniń turǵyny Fei Garsia.
Mundai ortalyqtar birneshe jyl buryn alǵash ret AQSh-ta ashyldy. Qazir Qurama Shtattarda osyndai júzdegen mekeme bar. Bul tájiribe kórshiles Kanada men Aspan asty elinde birtindep engizilip jatyr. Al Singapýr úkimeti aldaǵy jyldary osyndai 10 mekeme ashýdy josparlap otyr.
