Sankt-Peterbýrgte shahmattan ótip jatqan Álem chempionatynyń alǵashqy úsh týrynda Dinara Sádýaqasova men Jansaia Ábdimálik Resei, Mońǵoliia, Grekiia jáne Germaniiadan kelgen qarsylastaryn ońai jeńdi, dep habarlaidy Qazaqstan Shahmat federatsiiasy Feisbýktegi paraqshasynda.
Tórtinshi týrda qyzdar bir-birimen oinap, 0,5:0,5 esebindegi teń nátijege qol qoidy.
Gúlishan Nahbaeva birinshi týrda álemniń úsh dúrkin chempiony Anna Mýzychýkpen kezdesip, jeńilip qaldy. Biraq 2-4 týrlarda qatarynan úsh ret jeńiske jetip, esesin qaitardy.
Sonymen, qazaqstandyq sportshylar 4-týrdy toǵyz jeńis, bir jeńilispen aiaqtady.
Erler de rapidtiń alǵashqy bes týrynda jaqsy oiyn kórsetti. Rústem Hýsnýtdinov ekinshi raýndta Belarýs sportshysy Sergei Jigalkodan basym tústi. Qalǵan partiialarda teń nátije tirkeldi. Rinat Jumabaev reseilik Kiril Shýbin, Vsevolod Ovchinnikov jáne Dreev Alekseidi jeńdi. Halyqaralyq grossmeisterimiz tek óz otandasy Daniil Dýbovqa ese jiberdi.
«Álem chempionatynyń alǵashqy kúniniń qorytyndylary boiynsha, qazaqstandyq shahmatshylar tamasha nátijelerge qol jetkizdi. Kelesi partiialarda bizdiń shahmatshylar munan da sapaly oiyn kórsetedi dep senemin», - deidi Qazaqstan Shahmat federatsiiasynyń atqarýshy direktory Irina Grishenko.
Eske sala keteiik, rapid jáne blits boiynsha álem chempionatyna Magnýs Karlsen, Hikarý Nakamýra, Levon Aronian jáne Sergei Kariakin sekildi juldyzdar kelgen. Qazaqstan namysyn osy chempionatta alty sportshy: Rinat Jumabaev, Murtas Qajǵaliev, Rústem Hýsnýtdinov, Dinara Sádýaqasova, Jansaia Ábdimálik jáne Gúlishan Nahbaevalar qorǵap jatyr.
