QR Densaýlyq saqtaý ministri Aleksei Tsoi aýyldyq eldi mekenderde meditsinalyq kómektiń qalai damitynyn aitty, dep habarlaidy QazAqparat.
«Bizde COVID-ten bólek aýrýlar boiynsha da meditsinalyq kómek kórsetý toqtaǵan joq. Aýyldarda densaýlyq saqtaý salasyn damytýǵa úlken kóńil bólip jatyrmyz. Biz úshin meditsinalyq kómektiń árbir eldi mekende bolýy jáne árbir azamatqa jetýi óte mańyzdy. Qazin sol úshin kólik meditsinasyn damytyp jatyrmyz. Qazaqstandaǵy óńirlerdiń bárine 149 jyljymaly meditsinalyq keshen attandyrylǵan. Olar qajetti meditsinalyq jabdyqtarmen, tońazytqyshtarmen, EKG apparattarymen, rentgenmen jabdyqtaldy. Birinshi kezekte meditsinalyq obektiler múldem joq eldi mekenderge basymdyq berip otyrmyz. Jyljymaly keshenniń kómegimen sol aýyldarǵa dári-dármekter jetkizilip, profilaktikalyq tekserýler júrgizý jolǵa qoiyldy», - dedi Aleksei Tsoi QR Prezidenti janyndaǵy Adam quqyqtary jónindegi komissiia otyrysynyń aldynda BAQ ókilderine bergen suhbatynda.
Ministrdiń aitýyna qaraǵanda, jospar boiynsha barlyq tirek aýyldar bastapqy býyndaǵy meditsinalyq nysandarmen júz paiyz qamtamasyz etilýi tiis.
«Biz bul baǵdarlamaǵa basa nazar aýdaramyz. Aldaǵy bes jylda tirek aýyldardyń bárinde meditsinalyq nysandar bolýy kerek. Ár óńirde meditsinalyq kómekpen qamtylmaǵan eldi mekender bar jáne azamattar aýdan ortalyqtaryna barýǵa májbúr.
Eń bastysy – maman daiarlaý. Qazir biz maman tapshylyǵyn joiý úshin ár oblysqa qaita oqytylǵan meditsina qyzmetkerlerin jiberip jatyrmyz. Solardy barǵan jerinde turaqtatý úlken mindet bolyp otyr», - dedi vedomstvo basshysy.
