QR Densaýlyq saqtaý ministri Alekseei Tsoi revaktsinatsiiadan ótkisi kelgender nege aǵzadaǵy antidene synamasyn tapsyrý kerektigin túsindirdi, dep habarlaidy QazAqparat.
«Vaktsina adam aǵzasyn belgili bir deńgeide aýrýdan qorǵai alady. Bizge ótinishter túsken. Ekpe alǵan azamattardyń keibiri ýaqyt óte kelip, aǵzasynda antidene mólsheriniń túsip ketkenin baiqaǵan. Biz sondai adamdarǵa qaita ekpe alýdy usynamyz. Al negizi revaktsinatsiia birinshi kezekte alǵy shepte júrgen qyzmetkerlerge usynylady.
Bizdiń negizgi kózdegenimiz – koronavirýs juqtyrý qaýpimen betpe-bet keletin adamdar revaktsinatsiiaǵa jatady. Biz olarǵa keńes beremiz. Basqa azamattar aǵzasynda antinede mólsheri túsip ketkenin kórse, qosymsha doza alý múmkindigi bar», - degen ministr, bútin álemde qaita vaktsinalaý áýeli alǵy sheptegi qyzmetkerler men osal toptar arasynda júrgizilip jatqanyn eske saldy.
«Buǵan deiin aitqanymdai, men aǵzamdaǵy antideneniń mólsherin teksergeli otyrǵan joqpyn. Biz alǵy sheptegi qyzmetker bolǵandyqtan, revaktsinatsiianyń merzimi kelgende antidene taldaýynsyz-aq, qaita ekpe alýǵa baramyz.
Jeke óz basym antidene synamasyn tapsyrǵaly otyrǵan joqpyn. Onyń qajettigin kórip turǵanym joq. Antidene mólsherin bilip baryp qaita vaktsinalaýǵa barý bylaiǵy adamdarǵa qosymsha múmkindik retinde usynylyp otyrǵanyn túsiný mańyzdy. Vaktsinanyń eki komponentin alyp, ýaqyt óte kele antidene joq ekenin kórgen azamattarǵa qaita vaktsina alýdy usynamyz, keńes beremiz», - dedi ministr.
Sondai-aq, ol elde revaktsinatsiia halyqaralyq tájiribege súienip jalǵasatynyn eskertti. Ózge elder revaktsinatsiiaǵa jatatyn sanattardyń qataryn keńeitse, Qazaqstanda da bul másele qarastyrylýy múmkin.
«Áýel basta biz qaita vaktsinalaýdy alǵy sheptegi mamandardan bastaýdy kózdegen bolatynbyz. Búkil álemde solai istelip jatyr. Álemde jańa kórsetkishter paida bolyp, revaktsinatsiiaǵa jatatyn sanattar keńeitilgende biz de sol jolmen júremiz. Bizge qazir halyqaralyq tájiribe mańyzdy bolyp otyr», - dedi Aleksei Tsoi.
