Aldaǵy úsh kúnde Qazaqstannyń batys oblystarynda kún jylynyp, qalǵan óńirlerde aýa raiy qaita sýytady, dep habarlaidy "Ult aqparat" Qazgidrometke silteme jasap.
Orta Aziia aýdandarynan jyljyǵan tsiklon respýblikanyń ońtústigi men ońtústik-shyǵysyna jańbyr men qar ákeledi. Soǵan bailanysty kóktaiǵaq bolyp, tuman túsedi, shyǵysta qarly boran soǵady.
Aldaǵy kúnderi aýa temperatýrasy azdap kóterilgenimen, 11 qańtarda, ásirese Qazaqstannyń shyǵys aýdandarynda kúrt tómendep, túnde minýs 30...37 gradýsqa deiin aiaz bolady.
Respýblikanyń soltústik jáne ortalyq oblystaryna joǵary atmosfera qysymynyń yqpaly júrip turǵandyqtan, tek kei aýdandarda ǵana qar jaýýy múmkin, al túnde aýa temperatýrasy minýs 28...35 gradýsqa deiin tómendeidi.
Batys oblystarda azdaǵan aiazdan keiin kún jylynyp, qar jaýady, kóktaiǵaq bolýy múmkin.
