Keiingi ailarda Qazaqstannyń syrtqy saiasi belsendiligi edáýir artty. Prezident Qasym-Jomart Toqaev ekijaqty jáne kópjaqty formatta ótken birqatar iri jiynǵa, sonyń ishinde Túrikmenstandaǵy Ortalyq Aziia memleketteri basshylarynyń konsýltativti kezdesýine, Tájikstandaǵy UQShU men ShYU sammitterine qatysty, Koreia Respýblikasyna memlekettik saparmen jáne Resei Federatsiiasyna jumys saparymen bardy.
Sonymen qatar Dýshanbede Iran Prezidentimen jáne Pákistannyń Premer-ministrimen jeke-jeke kezdesýler ótkizdi, dep jazdy búgin óziniń Facebook paraqshasynda QR Prezidentiniń baspasóz hatshysy Berik Ýáli.
Qasym-Jomart Toqaev UQShU-nyń beiresmi sammitinde, Shyǵys ekonomikalyq forýmynda jáne Qazaqstan men Resei arasyndaǵy Óńiraralyq yntymaqtastyq forýmynda beinebailanys rejiminde sóz sóiledi.
21-28 qyrkúiek aralyǵynda Memleket basshysy BUU Bas Assambleiasynyń 76-sessiiasy aiasynda ótken tórt birdei is-sharaǵa – Jalpy saiasi debattarǵa, BUU-nyń Azyq-túlik júieleri jónindegi sammitine, COVID-19 pandemiiasy jónindegi jahandyq sammitke jáne Iadrolyq qarýdy tolyq joiý jolyndaǵy Halyqaralyq kúres kúnine arnalǵan joǵary deńgeidegi plenarlyq otyrystarǵa qatysty.
Eki aidyń ishinde Qasym-Jomart Toqaev Resei, Frantsiia, Belarýs, Ózbekstan, Saýd Arabiiasy memleketteriniń prezidentterimen jáne Eýropalyq odaq basshysymen telefon arqyly sóilesti.
Sonymen qatar Qazaqstan astanasy asa joǵary deńgeidegi sheteldik delegatsiialardy kóp qabyldai bastady. Resei Premer-ministri, Shveitsariia, Tájikstan, Túrkiia, Ázerbaijan parlamentteriniń spikerleri, Soltústik Makedoniianyń Syrtqy ister ministri, Saýd Arabiiasy Koroldiginiń Investitsiia ministri, Bashqurtstan Respýblikasynyń basshysy, sondai-aq halyqaralyq uiymdar men sheteldik iri kompaniialardyń ókilderi Qazaqstan Prezidentiniń qabyldaýynda boldy.
Jalpy tamyz-qyrkúiek ailarynda Qasym-Jomart Toqaev álemdik deńgeidegi 10 sammit pen forýmǵa, onyń úsheýine oflain, jeteýine onlain rejimde qatysty. 2 memleketke saparmen bardy jáne 7 eldiń basshylarymen telefon arqyly sóilesti. Sonymen qatar 12 sheteldik delegatsiiany qabyldady.
Qazaqstan barlyq baǵyt boiynsha syrtqy saiasi arenadaǵy yqpaldastyǵyn nyǵaityp keledi dep aitýǵa bolady. Halyqaralyq bailanystardyń da geografiiasy keńeie tústi.
Qazirgi ahýal koronavirýs pandemiiasyna deiingi kezeńge qaraǵanda halyqaralyq yntymaqtastyqtyń mańyzy búginde arta túskenin kórsetedi. Álemde jańa syn-tegeýrinder men qaýip-qaterler paida boldy. Kóptegen aimaqta, onyń ishinde Ortalyq Aziia memleketterimen shekaralas óńirlerde jaǵdai shielenisip tur.
Ekonomikalyq daǵdarys is júzinde barlyq qurlyqty qamtydy. Kóptegen elder arasyndaǵy taýar ainalymynyń deńgeii tómendep, kólik-logistikalyq bailanystar salasynda qiyndyqtar týyndady. Memleketter basshylarynyń saiasi erik-jigerinsiz, álemniń qalypty ómirge oralýy ekitalai.
Pandemiia saldaryn eńserý basty máselelerdiń biri bolyp qala beretini sózsiz. Saiasatkerler COVID-19 indetine qarsy vaktsina jasaý jáne tasymaldaý jónindegi yntymaqtastyq máselelerin talqylaýda. Qazaqstan Prezidenti osy ózekti problemaǵa qatysty pikirin BUU Bas Assambleiasynyń sessiiasynda, sondai-aq basqa da kópjaqty jáne ekijaqty is-sharalar barysynda aitty.
Pandemiiadan keiingi álemdegi jaǵdaiǵa qatysty másele joǵary deńgeidegi kezdesýlerdiń kún tártibine jii qoiyla bastady. Atap aitqanda, saiasi, saýda-ekonomikalyq, investitsiialyq jáne tehnologiialyq yntymaqtastyqtyń jańa formalary talqylanyp júr. Sonymen qatar Ońtústik Koreianyń, Reseidiń, Eýropa odaǵynyń basshylarymen kelissózder kezinde tsifrlandyrý jáne jańa tehnologiialar salalaryndaǵy naqty jobalardy iske asyrýǵa mán berildi.
Halyqaralyq yntymaqtastyqtyń barlyq baǵyt boiynsha jandanýy pandemiiadan keiingi kezeńdegi álemniń qalyptasýyna yqpal etýge tiis. Sol kezde shekaralar ashylyp, saiasi, ekonomikalyq, mádeni-gýmanitarlyq jáne halyqaralyq bailanystar jańa deńgeige kóteriledi.
Aldaǵy ailarda da Prezidenttiń jumys kestesi óte tyǵyz bolmaq. Atap aitqanda, jaqyn jáne alys shetelderge saparmen barý, birneshe sammitke qatysý, sondai-aq Qazaqstanǵa keletin joǵary laýazymdy sheteldik qonaqtarmen kezdesý jáne basqa da mańyzdy syrtqy saiasi is-sharalar josparlanǵan.
