Foto: QR SIM
Syrtqy ister ministrliginiń resmi ókili Aibek Smadiiarov Túrkiiadaǵy jol apatynyń mán-jaiyn jariialady, - dep habarlaidy Sputnik Qazaqstan.
Safari-djipte 15 adam bolǵan. Oǵan eki balasymen birge qazaqstandyq erli-zaiypty da mingen. Olar 30 tamyzda Alaniiaǵa demalýǵa barǵan. Búgin elge qaitýdy josparlaǵan.
"Keshe ekskýrsiiaǵa shyǵý úshin safari kóligine mingen. Ol kólik qatar kele jatqan basqa kólikpen soqtyǵysqan. Ókinishke qarai, oqiǵa ornynda 1989 jyly týǵan áiel men onyń eki jasar qyzy qaitys boldy. 1986 jyly týǵan er azamat, sol áieldiń kúieýi aýyr jaǵdaida jansaqtaý bóliminde jatyr. Al 2014 jyly týǵan uly aýrýhanada, densaýlyǵy men ómirine qaýip tónip turǵan joq, qol-aiaǵy sál isip ketken", - dedi Smadiiarov búgingi brifingte.
Onyń aitýynsha, túrik politsiiasy jol apatynyń aldyn ala sebebin jariialaǵan.
"Bizdiń estýimizshe, ázirge ras-ótirigin bilmeimin, ony tergeý anyqtai jatar, adamdar qaýipsizdik beldigin taqpaǵan. Bári kólikten ushyp túsken. Sondyqtan shetelde júrgen azamattarymyzǵa aitarymyz, qaýipsizdik sharalaryn barynsha saqtańyzdar", - dep atap ótti Smadiiarov.
Ministrliktiń resmi ókili 15 adamnyń shaǵyn safari djipke qalai syiǵanyn túsinbei otyr.
Buǵan deiin Alaniiada demalyp qaitqan Sputnik Qazaqstannyń oqyrmany safari-djipte eshqandai qaýipsizdik beldigin kórmegenin aitqan.
"Óz basym qaýipsizdik beldigin kórgen emespin. 10-15 adamdy djiptiń artyna otyrǵyzyp qoiady da, bir-birimen jarysady. Tóbesi ashyq, eshkim otyrmaidy, túregep turady. Jolda bir-birine sý shashady. Kólik júrgizýshisi qaýipsizdikti saqtaý qajettigin aitpaidy da, olar oiyn-saýyqtyń kóp bolǵanyn qalaidy ǵoi. Internette videolary kóp", - deidi Astana turǵyny.
