Úrjar men Úsharal áýejailary Boeing, Airbus ushaqtaryn qabyldaityn bolady. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy "Ult aqparat".
«Ushý qaýipsizdigin qamtamasyz etý jáne ishki týrizmdi damytý úshin Úrjar jáne Úsharal shaǵyn qalalarynda jergilikti atqarýshy organdar ushý-qoný jolaqtaryn jańartý boiynsha jumysty bastady. Jóndeý jolaýshylar úshin qolaisyzdyq týǵyzatynyn túsinemiz. Biraq jańartý aiaqtalǵannan keiin bul áýejailar zamanaýi Boeing jáne Airbus reaktivti ushaqtaryn qabyldai alady», - dedi Beibit Atamqulov.
Onyń atap ótýinshe, atalǵan qalalardyń áýejailarynyń ushý-qoný jolaǵy jaǵartylǵannan keiin kelesi jaz mezgilderinde Alakólge baratyn týrister sany artady.
«Áýejailardy jańartý kezeńinde Alakól kóliniń qoljetimdiligin qamtamasyz etý úshin avtobýs jáne temirjol qatynasy ulǵaitylady. Tiisti jumys júrgizilip jatyr. Fly Arystan loýkosteriniń marshrýttyq jelisin keńeitý jáne reisterdi sýbsidiialaý arqyly biz áýe tasymalyn halyq úshin qoljetimdi etemiz. Negizinde Balqash, Alakól, Kókshetaý siiaqty tanymal týristik baǵyttarǵa nazar aýdarylyp otyr. Bul maqsatqa 2,4 mlrd teńge bólindi. Búgingi tańda keibir baǵyttar boiynsha ushý quny temirjol kóligimen júrýden arzan ekenin atap ótkim keledi», - dedi ministr.
