Foto: Jetisý oblysy ákimdigi
Biyl shomylý maýsymyna qarai jańarǵan infraqurylymy bar, yńǵaily kóligi qarastyrylǵan, qaýipsizdik sharalary kúsheitilgen Alakól týristerdi qarsy alýǵa daiyn, dep habarlaidy Ult.kz.
Jetisý oblysy ákiminiń baspasóz qyzmeti jańa maýsymnyń 10 basty igiligin tizbektedi:
▪️Úsharal qalasy baǵytynda áýe reisteriniń sany artty. Endi Alakólge kún saiyn Astana jáne Almaty qalalarynan «Almaty-Úsharal» jáne «Astana-Úsharal» baǵyttary arqyly jetýge bolady. Memleket tarapynan sýbsidiialanǵan biletter quny - nebáry 20 000 teńge. Áýejaidyń ushý-qoný jolaǵyn qaita jańartýdyń arqasynda Úsharal qalasynda iri áýe kemelerin qabyldaýǵa jaǵdai jasalǵan.
▪️Jazǵy shomylý maýsymyna qarai qosymsha poiyzdar iske qosyldy. Kólge 13 poiyz júredi, onyń ishinde Astana men Almatydan «Talgo» júrdek poiyzy da bar. Óskemen, Pavlodar, Qyzylorda, Semei jáne Aqtoǵai baǵyttary qosyldy.
▪️Aqshi jáne Kóktuma aýyldaryna avtobýs marshrýttary uiymdastyryldy. Almatydaǵy «Sairan» jáne Taldyqorǵandaǵy avtobeketterden avtobýstar turaqty júredi. Bilet quny - 5 000 teńgeden 9 000 teńgege deiin.
▪️Aqshi aýylynda dárigerlik ambýlatoriia, dárihana jáne táýlik boiy Jedel járdem jumys isteidi. Oblys ortalyǵynan hirýrgtar, kardiologtar, travmatologtar jáne basqa da mamandar issaparǵa jiberiledi.
▪️Sýdaǵy qaýipsizdikti jáne órt qaýipsizdigin qamtamasyz etý úshin biylǵy shomylý maýsymynda Aqshi aýylynda táýlik boiy Tótenshe jaǵdailar departamentiniń qutqarý bólimsheleriniń kezekshiligi uiymdastyrylady. 19 qutqarýshy men qosymsha 28 politsiia qyzmetkeri jaǵalaýda tártipti qamtamasyz etedi. Qutqarý jumystarynyń tiimdiligin arttyrý úshin 9 qutqarý munarasy ornatylady.
▪️Tyiym salynǵan jerlerde sý kólikteriniń baqylaýsyz qozǵalysy máselesin retteý maqsatynda Jetisý oblysynda Sýdy ortaq paidalaný erejesi bekitildi. Erejelerdiń saqtalýyn kóliktik baqylaý inspektsiiasy júrgizedi, bul rette inspektorlar sany ulǵaidy. 3 sý kólik turaǵy jáne quqyq buzýshylarǵa arnalǵan arnaiy 1 aiyppul turaǵy bolady.
▪️Bailanys pen Internettiń sapasyn arttyrý maqsatynda jaǵalaýda 16 bazalyq stantsiia jumys isteidi, 2024 jyly optikalyq-talshyqty jeli tartyldy. Internet bailanysyna týristik nysandar kezeń-kezeńimen qosylýda.
▪️Sondai-aq jaǵalaýdyń sanitarlyq infraqurylymyn jaqsartý úshin birqatar sharalar qabyldanýda. Búginge deiin 11 sanitarlyq-gigienalyq torap qoiylǵan, maýsymnyń sońyna deiin taǵy 12-si qoiylady. Qosymsha 60 qoqys jáshigi qoiylyp, 20 biotýalet ornatylady.
▪️Aqshi aýylynda káriz-tazartý qurylysy bastady, bul – óńirdiń ekologiialyq qaýipsizdigin qamtamasyz etýge degen mańyzdy qadam.
▪️Elektrmen úzdiksiz jabdyqtaýdy qamtamasyz etý úshin jańa «Aqshi» qosalqy stantsiiasynyń qurylysy júrgizilýde, biyl Beskólden Aqshige deiin joǵary voltty elektr berý jelilerin salý jumystary aiaqtalady. Sondai-aq, Kóktuma jáne Aqshi aýyldarynda jaǵalaýdy nyǵaitýdyń aýqymdy jumystary bastaldy.
Ákimdiktiń habarlaýynsha, Alakól demalys orny týrizmniń eń tanymal baǵyty retinde únemi damý ústinde. Demalys ornyna kólikpen barý múmkindigin keńeitý, qaýipsizdikti qamtamasyz etý, jaǵalaýdyń ekologiialyq infraqurylymy men zamanǵa sai qolaily jaǵdai jasaý boiynsha jumystar jalǵasa bermek.
