Almatyda ál-Farabi atyndaǵy Qazaq ulttyq ýniversitetinde Qazaqstan Respýblikasynyń Memlekettik hatshysy, Ábý Nasyr ál-Farabidiń 1150 jyldyǵyn daiyndaý jáne ótkizý jónindegi memlekettik komissiianyń tóraǵasy Qyrymbek Kósherbaevtyń qatysýymen mereitoi jylynyń qorytyndysy shyǵaryldy, dep habarlaidy "Ult aqparat".
Resmi shara bastalmas buryn Ál-Farabi atyndaǵy QazUÝ janyndaǵy Ál-Farabi halyqaralyq ortalyǵynda álemge Ál-Mashani degen atpen tanymal áigili ǵalym jáne farabitanýshy Aqjan Jaqsybekuly Mashanovtyń biýstiniń ashylý saltanaty ótti.
Memlekettik hatshy saltanatty rásimdegi quttyqtaý sózinde adamzattyń Ekinshi Ustazy Ál-Farabidiń Qazaqstan aýmaǵynda Otyrarda bir kezderi Farabi dep atalǵan Qazaqstan men Ortalyq Aziianyń ejelgi mádeni ortalyǵynda dúniege kelgenin álemge ǵylymi turǵydan dáleldegen qazaqstandyq farabitaný mektebiniń negizin qalaýshysynyń erekshe úlesin atap ótti.
Osydan jarty ǵasyr buryn 1975 jyly IýNESKO qamqorshylyǵymen Qazaqstannyń Almaty qalasynda ótken Ál-Farabidiń 1100 jyldyǵyna arnalǵan halyqaralyq forým ótkizý týraly sheshimniń qabyldanýy qazaqstandyq ǵalymnyń baǵa jetpes eńbeginiń moiyndalýynyń taǵy bir kórinisi boldy.
Dóńgelek ústel formatynda ótken ǵalymdarmen kezdesý barysynda Qyrymbek Kósherbaev Ál-Farabidiń 1150 jyldyq mereitoiynyń keibir qorytyndylaryn shyǵaryp, mereitoilyq jyl IýNESKO-nyń qamqorlyǵymen halyqaralyq deńgeide atap ótilýde ekendigin atap ótti. Pandemiiaǵa qaramastan, qazaqstandyq farabitanýshylar men ǵylymi qoǵamdastyq uly ǵalymnyń murasyn elde jáne búkil álemde keńinen nasihattap dáripteý boiynsha orasan zor jumys atqardy.
Mereitoi sharalaryna qatysýǵa halyqaralyq qoǵamdastyq jáne akademiialyq orta keń aýqymda tartyldy, olardyń ishinde BUU men IýNESKO, IYU, TÚRKSOI, diplomatiialyq missiialardyń ókilderi, sondai-aq sheteldik jetekshi farabitanýshy ǵalymdar bar.
Sheteldegi Qazaqstannyń Elshilikterimen jáne Ál-Farabi ortalyqtarynyń qoldaýymen jáne jetekshi sheteldik ýniversitettermen birlesip – Oksford ýniversiteti, Djavaharlal Nerý ýniversiteti, Ystanmbul ýniversiteti, Kapodistri atyndaǵy Afina ulttyq ýniversiteti, Sofiia ýniversiteti, Damask ýniversiteti, Egipet ýniversiteti jáne basqa ýniversitettermen birqatar halyqaralyq konferentsiialar ótkizildi.
Ál-Farabidiń mereitoiy Úndistan, Singapýr, Malaiziia jáne Indoneziiada atalyp ótti. Halyqaralyq is-sharalarǵa álemniń 50 eliniń atynan 100-den astam ýniversitetterden jáne taǵy basqa uiymdardan 12 myńnan astam adam qamtyldy.
Respýblikada onlain rejimde 60-tan astam konferentsiia, dóńgelek ústelder men ǵylymi seminarlar ótti. Máselen, áleýmettik jelilerde ashyq qoljetimdilikpen «Parasattylyq saǵaty» jalpyrespýblikalyq aktsiiasy, «Ál-Farabi jáne qaiyrymdy qoǵam» atty videodáris jáne «Ekinshi Ustaz» onlain veb-seminarlar seriiasy ótkizildi.
«Qaiyrymdy qoǵam» chellendjine álemniń 7 elinen kelgen sheteldik stýdenttermen qosa, Qazaqstannyń joǵary oqý oryndarynyń 14 myńǵa jýyq stýdenti qatysty. «Ál-Farabi» halyqaralyq pándik olimpiadasyna alys jáne jaqyn shetelderdiń 10 elinen 9,5 myńnan astam mektep oqýshysy qatysty.
Olimpiada jeńimpazdaryna ál-Farabi atyndaǵy QazUÝ-da oqýǵa 40 bilim granty bólindi.
Sonymen qatar, Ál-Farabiǵa arnalǵan 7 monografiia, Ál-Farabidiń dáieksózder jinaǵy, sonymen qatar «Qaiyrymdylyq» oilary men naqyl sózder jinaǵy qazaq, orys jáne aǵylshyn tilderinde jaryq kórdi. Ál-Farabidiń buryn jariialanbaǵan úsh traktaty arab tilinen qazaq tiline aýdaryldy.
Sondai-aq, kezdesý aiasynda álemde tuńǵysh ret jaryq kórgen «Ál-Farabi» entsiklopediiasynyń tusaýkeseri ótken bolatyn.
QR Memlekettik hatshysynyń sapary aiasynda Pan Gi Mýn atyndaǵy Turaqty damý institýty men tórtinshi merzim qatarynan QazUÝ basqaryp kele jatqan BUU-nyń «Akademiialyq yqpal» baǵdarlamasynyń Ǵalamdyq habynyń jańartylǵan keńsesiniń tusaýkeseri ótti.
Sondai-aq, Qyrymbek Kósherbaev ýniversitet ǵalymdarynyń, sonyń ishinde zamanaýi IT-tehnologiialardy qoldana otyryp jasaǵan birqatar zerttemelerimen tanysty. Úlken ǵylymi áleýetke ie eldiń jetekshi ýniversiteti koronavirýs pandemiiasynyń taralýymen kúresýge óz úlesin qosýda.
