Almatyda ótip jatqan qarjygerler kongresinde QR Ulttyq bankiniń tóraǵasy Daniiar Aqyshev bankterge qoiylatyn zamanaýi talaptardy atady, dep habarlaidy "QazAqparat".
«Ekonomikanyń durys damýy bankterdiń qarjylyq turaqtylyǵyna tikelei bailanysty. Osy oraida biz bankterdi zaman talabyna beiimdeý jumystaryn qolǵa aldyq. 2 jylda 5 banktiń litsenziiasy qaitaryldy. Buǵan korporativtik standarttary tómen jáne táýekelderdi basqarý júiesi álsiz bankter ilikti. Sonymen qatar, kóp bankter ózara bailanystaǵy tulǵalarǵa qaryz bergeni, qarjylyq esepterdi jalǵan etip kórsetkeni úshin qarjy júiesinen shyǵaryldy», - dedi bas bankir.
D. Aqyshev Kazkommertsbank bankiniń saýyqtyrý protsesi bastalǵanyn, onyń Halyq bankine qosylǵanyn aityp ótti. Osynyń nátijesinde tek Qazaqstan emes, TMD kóleminde básekege qailetti qarjy institýty paida boldy.
«Ulttyq bank bank sektorynyń turaqtylyǵyn arttyratyn keshendi baǵdarlama qurdy. Basty maqsat - bankterdi aktsionerlerdiń qarjysyn tarta otyryp saýyqtyrý. Bul óz kezeginde birneshe jyl stagnatsiiada turyp qalǵan biznesti nesielendirýdiń qaita jandanýy septigin tigizbek. Saý bankterdiń ekonomikany nesiemen qamtýynyń kólemi 7 paiyzǵa artqan», - dedi ol.
Onyń aitýynsha, osy baǵytta birneshe jumys atqarylyp jatyr. Onyń biri - aldyn ala sheship alýǵa bolmaityn jinaq shottary ashylǵanyn, halyqtyń bankterdegi jinaqtaryna maksimaldy mólsherleme qoiylǵanyn atap ótti.
«Salymdardyń bárine ortaq sharttar endi ózgerdi. 1 qazannan bastap salymdarǵa merzimi, túri, tolyqtyrý quqyǵyna qarai maksimaldy mólsherleme qoiylady», - dedi ol.
Ulttyq bank bankterdi baqylaýda 2019 jyldyń 1 qańtarynan bastap jańa júiege kóshti.
«Endi biz problemalyq bankterdi retteý (Recovery and Resolution tools) júiesine kóship jatyrmyz. Bul júiege sáikes nashar bankter májbúrli túrde taratylady. Bul jańashyldyqtar halyqaralyq tájiribede óte jaqsy baǵa aldy», - dedi ol.
Bas bankirdiń aitýynsha, talqylaý institýtynyń ashylýy qarjylyq uiymdardaǵy alǵashqy problemalardy anyqtaýǵa, investorlardyń quqyǵy men múddesin qorǵaýǵa baǵyttalǵan.
Tólem qabilettiligi nashar bankterdi anyqtaý rejimi jetildiriletin bolady.
«Áńgime, bank aktivteriniń sapasyn jan-jaqty baǵalaý týraly. Bizdiń oiymyzsha bul rásim tek bankterdiń ózine qajet nárse. Táýelsiz baǵalaý investorlardyń qarjylyq institýttarǵa senimin arttyrady», - dedi Aqyshev.
Aita ketý kerek, búgin Almatyda Qazaqstan qarjygerleriniń VIII kongresi bastaldy. Mańyzdy jiyn tól teńgemizdiń dúniege kelgenine 25 jyl tolýyna orai uiymdastyrylyp otyr.
