AQSh Prezidenti Donald Tramptyń Túrkiia basshysy Rejep Taiyp Erdoǵanǵa 9 qazanda joldaǵan haty jariialandy. Hattyń kóshirmesin jýrnalist Trish Regan bólisti. Keiin Aq úi bul hatty Tramp jazǵanyn rastady.
Tramp hatynda "eger Ankara Siriianyń soltústik-shyǵysynda áskeri operatsiia bastasa, Túrkiia ekonomikasyn joiyp jiberetinin" jazǵan.
"Eger barlyǵyn durys ári adamgershilikke sai jasasańyzdar tarihta jaqsy attaryńyz qalady. Biraq is nasyrǵa shapsa, tarihqa jaýyz bolyp enesizder. Aqymaq bolmańyzdar! Keiin habarlasamyn" dep jazǵan Tramp.
9 qazanda Túrkiia Siriianyń soltústik-shyǵysynda áskeri operatsiia bastaǵan. Túrkiia prezidenti Rejep Taiyp Erdoǵannyń sózinshe, bul operatsiianyń maqsaty - "DAISh terrorlyq uiymymen jáne kúrdterdiń qarýly jasaqtarymen kúres". Ankara osy operatsiia arqyly Siriianyń soltústik-shyǵysynda qaýipsiz aimaq quryp, Túrkiiadaǵy siriialyq bosqyndardy osy aýmaqqa ornalastyrǵysy keledi.
Halyqaralyq aqparat agenttikteri 9 qazannan beri Siriianyń soltústiginen 150 myń adam bosyp ketkenin habarlady. Túrkiia operatsiia bastaǵan kúni Tramp ákimshiligi AQSh bul operatsiiaǵa qatyspaitynyn málimdep, Amerika áskeri Siriianyń soltústik-shyǵysyn tastap kete bastaǵan.
Siriialyq kúrdter – AQSh-tyń "Islam memleketi" terroristik tobymen kúreste negizgi seriktesi. Al Túrkiia kúrd jasaqtaryn "terrorlyq top" dep sanaidy.
2016 jyly kúrdter Siriianyń soltústik aimaǵyna baqylaý ornatyp, "Rodjaba – Soltústik Siriia" federativti aimaǵyn qurǵanyn jariialaǵan. Kúrdter qurǵan aimaqqa Jazira, Kobani jáne Afrin qalalary engen.
