Elimizdiń Mádeniet jáne sport ministri Aqtoty Raiymqulova elordada jas oqyrmandarmen júzdesti, dep habarlaidy QazAqparat.
«Aldymen barshańyzdy búgingi dúniejúzilik jazýshylar kúnimen quttyqtaýǵa ruqsat etińizder. Elbasy Nursultan Nazarbaev bylai degen «keshegi babamyzben ǵana emes, búgingi baǵamyzben, erteńgi shamamyzben de maqtana alatyn ult bolýdy oilaýymyz kerek» dep úndeý joldaǵan bolatyn. Memleket basshysy Qasym-Jomart Toqaev elimizdiń barlyq turǵyndarynyń kúsh-jigerin qazaqstandyq oqyrman urpaqty tárbieleýge shaqyrdy. Osyǵan orai, bizdiń ministrlik 2021 jyldy elimizde balalar men jasóspirimderdiń kitap oqýyn qoldaý jyly dep jariialap otyr», - dedi Raiymqulova kezdesý barysynda.
Ministrdiń aitýynsha, aitýly datanyń el táýelsizdiginiń otyz jyldyǵyna sáikes kelýi qýantarlyq jaǵdai.
«Bilimdiden shyqqan sóz, talaptyǵa bolsyn kez» dep uly Abai atamyz aitqandai, endigi jerde kitap arqyly balalar men jasóspirimderimizdiń tárbiesine úńilip, olardyń kitap oqý mádenietin kóterýimiz qajet. Men búgin búldirshinder ózderińmen kitap oqý máselesin talqylaý úshin arnaiy ýaqytymdy bólip otyrmyn», - deidi ol.
Aitýly sharaǵa astanalyq balalalardan bólek, elimizdiń basqa óńirlerinen de oflain formatta qatysqandar boldy.
