Foto: QR TJM
Aqtóbe oblysy Yrǵyz aýdanynda da tótenshe jaǵdai jariialandy. Bul óńirdegi tótenshe jaǵdai jariialanǵan altynshy aýdan. Sonymen birge Aqtóbe qalasynda da túnde 100-den astam adam evakýatsiialandy, — dep habarlaidy «Ult aqparat» Aqtóbe oblysy ákiminiń baspasóz qyzmetine silteme jasap.
Aqtóbe oblysy boiynsha áli de jaǵdai turaqty emes. Qarǵaly ózeni arnasynan asyp, Aqtóbe qalasyndaǵy baý-baqsha ujymynda adamdar evakýatsiialandy.
«Qarǵaly sý qoimasy toldy jáne Qarǵaly ózeninde sý deńgeii kóterilip, Aqjar jáne Sadovoe turǵyn alaptary aýmaǵyndaǵy baý-baqsha ujymdaryn sý basý qaýpi týyndady. Tótenshe jaǵdailar departamenti, jergilikti atqarýshy organ ókilderi, politsiia men áskeriler 140-tan astam adamdy qaýipsiz jerge kóshirdi. Olardyń 25-i bala», — dedi Aqtóbe qalasy ákiminiń baspasóz hatshysy Aigúl Baimenova.
Onyń aitýynsha, túni boiy Qarǵaly ózeni boiynda ornalasqan baý-baqsha ujymdarynyń úiin saqtaý úshin sý burý, arnany bekitý jumystary júrgizildi. Sýdyń baǵytyn bógeý jumystaryna 80-nen asa áskeri, merdiger kompaniia ókilderi men 10-ǵa jýyq aýyr tehnika jumyldyryldy.
Aqtóbe oblysy ákiminiń baspasóz qyzmetiniń habarlaýynsha, Yrǵyz aýdanynda tasqyn sýdan kelgen zalal bar. Búgin munda jergilikti deńgeide tótenshe jaǵdai jariialandy.
Eske salsaq, buǵan deiin Aqtóbe qalasy men Oiyl, Qobda, Muǵaljar, Temir, Áiteke bi aýdandarynda tótenshe jaǵdai jariialandy.
