Aqtóbelik tasymaldaýshylar 55 teńgelik jolaqyny birden 200-212 teńgege kóterýdi surap otyr. Alǵashqy qoǵamdyq tyńdaýǵa saýsaqpen sanarlyqtai turǵyn jinaldy, dep habarlaidy QazAqparat tilshisi.
Aqtóbe qalasyndaǵy «Avtopark» JShS-i men memleket qarjylandyryp otyrǵan Qalalyq jolaýshylar tasymaly kásiporny jańa avtobýstar satyp alyp, keiin jolaqyny kóterýdi surady. Alǵashqy qoǵamdyq tyńdaý «Geolog» mádeniet úiinde ótti. Jiynǵa 10-ǵa jýyq turǵyn kelip, ózderiniń qarsylyqtaryn bildirdi. Al tasymaldaýshylar baǵany kóterýdiń sebebin túsindirdi.
«Avtopark» JShS-i» 212 teńgege, Qalalyq jolaýshylar tasymaly kásiporny 200 teńgege jolaqyny kóterýdi surady. Aqtóbe qalasynda jolaqy 2015 jyldan beri 55 teńge bolyp saqtalyp otyr»,- dedi Aqtóbe qalalyq jolaýshylar kóligi jáne avtomobil joldary bólimi basshysynyń orynbasary Baýyrjan Aldiiarov.
Qazirgi kezde Qalalyq jolaýshylar tasymaly kásipornynda 129 avtobýs bar. 2010-2017 jyldary shyǵarylǵan avtobýstardy ainalymǵa engizgen kásiporynnyń qaryzy 360 million teńgege jetken.
«Kásiporynda 300-den astam adam jumys isteidi. Onyń 190-y júrgizýshi. Kompaniiada júrgizýshilerge suranys bar. Jalaqy az bolǵan soń kóbi ketip qalady. Jańa avtobýstar alynǵan, ai saiyn lizingke 16 million teńgeden astam aqsha tóleý qajet. Suiytylǵan gaz, dizel baǵasy ósip tur. Sondyqtan shyǵyn eselenip tur»,- dedi Qalalyq jolaýshylar tasymaly kásipornynyń direktory Rústem Erǵaliev. Al «Avtopark» JSSh-i 34 baǵyt boiynsha qyzmet kórsetip otyr.
«Apta saiyn, ai saiyn qosalqy bólshekter qymbattap jatyr. Janar-jaǵarmai sharyqtap barady. Biz jolaqyny 212 teńgege kóterýdi surap otyrmyz. Sońǵy eki jylda 85 avtobýs alynyp, 1,7 milliard teńge jumsaldy»,- dedi kompaniia direktory AqarysTileýles. Al qoǵamdyq tyńdaýǵa kelgen turǵyndar birden qarsylyqtaryn bildirdi.
«Zeinetkerler, stýdentter men balalarǵa jeńildik bolǵany durys. Biz negizi jolaqynyń qymbattaýyna qarsymyz. Sebebi, bizdiń aýylǵa keletin №29 baǵyttaǵy avtobýstyń háli múshkil. Oryndyqtary jyrtylǵan, jazda ystyq, qysta salqyn. Stýdentterdiń qalai júretinin bilmeimin. Olar eńbekaqy almaidy, jumys istegen adam da 200 teńgeni taýyp berýge qinalady», - dedi turǵyn Sidiakina.
Aita keteiik, qoǵamdyq tyńdaý qalanyń birneshe aýmaǵynda ótedi. Depýtattar men qoǵamdyq uiym ókilderinen qurylǵan top turǵyndardyń aryzy men ótinishin tyńdaidy.
