Arystaǵy úilerdi qalpyna keltirýge barǵan aqtóbelikter jumystaryn erteń aiaqtalady, dep habarlaidy "Ult aqparat".
Arys qalasyn qalpyna keltirý jumystary kezinde Aqtóbe oblysyna 12-shi sektor bólindi. Munda 789 úi bar. Sarapshylar tekserip, tizimge alyp, 543 úige zaqym kelgenin anyqtady. Arnaiy qorytyndy shyǵarý jumystary 25 tamyz kúni aiaqtalǵan bolatyn. Sol kezde 246 úidiń iesi qandai da bir jóndeý jumystaryn qajet etpeitinin jazyp, kómekten bas tartty.
«Alaida olardyń 73-i Arys qalasynyń ákimdigine qaita aryz jazyp, jóndeý qajet dep suraǵan. Qala ákiminiń suranysyna sai sol 73 úige oblystyń qurylys kompaniialary jóndeý jumystaryn júrgizip berdi. Sebebi sol úilerde múgedekter men ardagerler, áleýmettik jaǵynan az qamtylǵan otbasylar turady. Máselen, tótenshe jaǵdai kezinde qaza bolǵan áskeri qyzmetker Baýyrjan Álimbekovtyń úiine kúrdeli jóndeý júrgizildi. Úiine jarylǵysh zat qulaǵan turǵynnyń baspanasy qaita salyndy. Tótenshe jaǵdai kezinde otaǵasy qaza bolǵan kópbalaly otbasynyń buryn úii tolyq bitpei turǵan. Oblys ákimi Ońdasyn Orazalinniń tapsyrmasymen ol úi de tolyq salyndy. Tekserý kezinde 37 úige kúrdeli jóndeý qajet boldy. Onyń 24-inde jumys tolyq aiaqtaldy», - dep habarlaidy oblys ákiminiń baspasóz qyzmeti.
Aita keteiik, turǵyndardyń ekeýi tehnikalyq tekserý qorytyndysymen kelispegen. Úi ieleri jóndeýge qajetti qarjyny ózderine berýin suraǵan. Aqtóbe oblysy 11 qyrkúiekte jumysty tolyq aiaqtaýdy josparlap otyr. Bul jumystarǵa 6 qurylys kompaniiasy men 395 adam jumyldyrylǵan.
