Aqtóbede № 27 mektep-litseidiń 10-synyby jabylyp qalýy múmkin. Ata-analar qarsylyq bildirdi, dep habarlaidy QazAqparat.
Aqtóbe qalasyndaǵy № 27 orta mektep-litseidiń ata-analary oqý jyly bastalǵan kúni ákimdikti jaǵalap júr. Sebebi mektep ákimshiligi 30 tamyzda 10-synyptyń jabylatynyn habarlaǵan.
«Balam mamyr aiynda 10-synypqa qalý úshin arnaiy test tapsyrdy. Barlyǵy 24 oqýshy ótip, osy oqý jylynda bir synyp ashylatyny belgili boldy. Al tamyzdyń 26-synda qaita jinap, keibir balalarǵa UBT-dan ótpeitinin basa aitqan. Sol kezde kóbi qujattaryn alyp ketti. Al jańa oqý jyly bastalarda, iaǵni, 30 tamyzda 10-synyptyń qazaq toby bolmaitynyn habarlady. Sonda da balalar sabaqqa keldi, biraq bos otyrdy. Búgin bes sabaq bolsa, tek dene shynyqtyrý men informatika ótken, aldyńǵy úsh sabaq muǵalimsiz bos otyrǵan», - deidi oqýshynyń anasy Raýshan Almahanova.
Mektep ákimshiligi bul máseleni ózderi sheshe almaitynyn, tek qalalyq bilim bólimi jaýap beretinin jetkizdi.
«Ótken jyly 25 oqýshy 9-synypty bitirdi. «Bilim týraly» Zańǵa sáikes 20 oqýshydan kem bolmaýy tiis. Bizdegi oqýshylardyń 10-y kolledjge oqýǵa túsip ketti. Nátijesinde 16 bala qaldy. Bireýi aýdannan kelgen bolatyn. Alty bala basqa mektepke aýysty. Birneshe ret ata-analarǵa eskertý berildi. Biz eshteńe sheshe almaimyz», - deidi №27 mektep-litsei direktorynyń mindetin atqarýshy Altyngúl Galeeva.
Al qalalyq bilim bólimi máseleni sheshýge kirisken.
«Ereje boiynsha synypta 25 oqýshydan kem bolmaýy tiis. Sondyqtan 10-synypty ashý múmkin bolmady. Ekonomikalyq jaǵynan da tiimsiz. Shynyn aitqanda oqý protsesi júrip jatyr. Ol qazaq synybynda qazir 11 oqýshy bar. Másele tolyǵymen sheshiledi. Iaǵni, ózge bilim ordalarynan oqýshylardy sol mektepke aýystyramyz», - dedi qalalyq bilim bóliminiń basshysy Saian Súleimenov.
